Segun Rubiella Toppenberg di Fundacion FADA:
ORANJESTAD (AAN): Aruba ta den e ultimo eventonan di Carnaval, faltando solamente dos siman y e paradanan di mas grandi di Carnaval. Campañanan di conscientisacion di ‘No stuur y bebe’ ta intensificando pa e mensahe yega na nos ciudadanonan y preveni lamentacion despues.
Señora Rubiella Toppenberg di Fundacion Anti Droga Aruba (Fada) a enfatisa cu BAR lo ta presente den tur skina di Carnaval 72 y ta encurasha e publico carnavalesco pa no ignora e mensahenan aki durante paradanan binidero y pa sea consciente tur momento.
El a enfatisa cu BAR lo ta presente den tur grupo di Carnaval. Lo tin boluntarionan cu lo ta partiendo e mensahe pa recorda tur hende riba BAR. Lo mira BAR riba tur pantaya durante e paradanan como recordatorio y conscientisacion na cada un pa ta responsabel, y no bebe y despues stuur.
Fada ta urgi tur ciudadano cu ta bay paradanan di Carnaval, y cu sa cu nan lo consumi alcohol, pa nan regla nan BAR, e amigo of familiar cu no ta bay bebe, prome cu nan sali for di cas.
Señora Toppenberg a remarca cu Fada lo ta trahando di cerca cu KPA. Tambe vocero di Polis señora Liliana Rasmijn activamente ta keda duna informacion riba paginanan social di KPA recordando pueblo di e amigo responsabel y enfatisando cu controlnan lo intensiva.
Algo hopi importante cu señora Toppenberg a remarca ta, cu apesar bo a regla un amigo responsabel pa stuur, no mester bebe di mas tampoco. Y tene cuenta principalmente pa duna un bon ehempel na e yiunan chikito cu ta presente. E mensahe ta keda pa cada ciudadano cu ta bay Carnaval, pa sea responsabel y tuma decisionnan responsabel, ta loke señora Toppenberg a enfatisa durante un entrevista recien cu DIARIO.
