Hoben arubano Justin Peña cu futuro prometedor como guitarista clasico

Hunto cu Janneke Oosterwijk a presenta bunita concierto na Aruba

ORANJESTAD (AAN):   Justin Peña ta un studiante arubiano na 'ArtEz Conservatory' y hunto cu Janneke Oosterwijk nan a duna un concierto aki na Aruba. Hunto nan ta forma parti di 'Era Nobo'.

Esaki tabata nan prome presentacion na Aruba. Na Hulanda nan a haci mas presentacion na scol y pafo di scol gratis pa tur hende, Peña a splica den entrevista cu DIARIO.

Justin y Janneke a conecta asina bon cu otro y pa e motibo ey a dicidi di sigui toca cantica hunto y forma un duo cu un repertorio varia.

E musiconan lo bay bek Hulanda unda nan lo keda pa algun tempo, pero lo regla tur cos pa bay Austria, Alemania, entre otro, pa asina nan por a ser a conoci tambe pafo di Hulanda.

Justin a conta cu e tin mas o menos 10 aña ta toca guitara clasico. El a cuminsa tocando 'cuatro' aki na Aruba. Na un edad basta jong el a dicidi di sigui su estudio di musica profesionalmente na un conservatorio na Hulanda.

Ademas di toca guitara clasico y cuatro tambe e ta toca 'bass guitar' y electrico. A compone mas di 10 cantica, tres di cual a wordo graba caba y gepost riba Youtube.

Na 2018, Justin a wordo acepta na ArtEZ Conservatory na Zwolle unda e ta studiando actualmente. Eynan el a conoce Janneke y asina ambos a dicidi di forma Era Nobo.

Janneke a nace na Hulanda, pero su infancia el a biba na Chile unda el a descubri e pasion pa toca guitara.

E ta toca tambe otro instrumentonan manera piano y drums.

Durante nan concierto na Aruba nan a toca composicionnan di artistanan clasico como tambe musica di Suramerica.