Documentario di ‘Dande di Aña Nobo’ mustrando con antes ta hombernan so tabata toca esaki

ORANJESTAD (AAN): E pelicula nobo cu lo pasa riba pantaya grandi na Aruba, esta ‘Dande di Aña Nobo’ ta bay back na un costumber di antes na Aruba riba Aña Nobo: E Dande di Tambu.

   E documetario ta cuminsa cu un introduccion di e cineasta Cindy Kerseborn.  Ta sigui cu un documentacion di e unico cantado di ‘Dande di Tambu’ di Aruba, Sr. Vicente Ras, kende ta celebra Aña Nobo como cantante di e Dande tradicional estilo di antes.

   E tambu compaña cu e klapmento di man ritmico ta duna Aruba su dande su zonido tradicional. E grupo di filmacion a sigui Vicente Ras (e tempo ey 87 aña di edad), ora e tabata prepara su mes ya algun dia prome cu Aña Nobo pa pasa porta pa porta cu su musica, pa asina hiba y comparti e miho deseonan na su compatriotanan. E canticanan cu Vicente ta canta, el a siña di su tata. Su tambu bieu un tempo tabata di su tata tambe. Si bo scucha bon loke e ta toca y expresa, bo lo por tende tocante di e costumbernan di e cultura Arubano.

  Apesar cu Dande ta familiar, e ta lanta tambe hopi pregunta cerca e Arubianonan.   Alegre pero critico, cu e tambu memey di pia den un veranda of den sombra bou di un palo di kwihi, algun pioneronan di Dande ta discuti cu otro tocante di e origen di nan musica tradicional. Dande, cu su ritmo contagioso, ta di origen Europeo, Africano of di aki mes? E tin algo spiritual, algo magico kisas? Of Dande por tin di haber cu e religion?

   Vicente Ras mes a pensa hopi di su descendencia. Den e registro di catibo na Archivo Nacional Aruba el a haya nomber di su antepasadonan ora e tabata busca contesta riba e pregunta si un familiar di dje di banda di mama por tabata un esclavo libera. Den tempo di sclavitud tabata prohibi pa toca y canta tambu, pero esnan sclavisa ta haci’e toch scondi.

   Awo Vicente Ras ta preocupa su mes pa e hecho cu cerca e hobennan no tin mucho animo mas pa e tradicion di antes aki. Pero e hobennan ta keda dedica na e Dande, tin un grupo chikito di hoben cu ta pone nan mesun ritmo di hip hop na dje. E Festival di Dande Hubenil ta percura mientrastanto pa e traspaso di e tradicion di musica di Dande na nos hobennan den e estilo original.

   Dande tabata antes un asunto di hende homber so. Algun hende homber tabata pensa cu e ser femenino no por invoca e bendicion di Aña Nobo pa medio di e Dande. Den su propio cas Titi Tromp, e gran señora di 90 aña di edad, ta sinta toca riba su tambu. Tres generacion di famia Tromp ta conta, burlando di nan mes, e storia di Dande for di e punto di bista di hende muhe. Con nan ta reacciona tocante di e exclusion? Ta hopi harimento tin y discusion cu hopi humor. E grupo ta toca varios tipo di instrumento musical: cuarta, wiri, tambu, maraca, tamborin y e clave. Un nieta ta canta y esnan presente ta join cu batimento di man.

   Cada biaha cu ripiti un enterpretacion di Dande, e ta asina fascinante y contagioso. E Dande ta haci bo feliz, hasta si ta pa prome biaha bo ta tend’e. E pelicula ta culmina cu e momento di cada Aña Nobo, unda Vicente Ras ta bisti su paña di Aña Nobo cu ayudo di su señora. E biaha aki e ta cla atrobe pa e Dande. E aña nobo ta yama …. Añ’ Nob’e!