ORANJESTAD (AAN): Diabierna anochi, despues di como 5 luna di preparacion, Miss Aruba Universe Helen Hernandez tabatin su momento di briya durante e competencia preliminar di e certamen di Miss Universe.
E evento a wordo transmiti virtualmente pa 7:00 pm for di stage luhoso di Seminole Hard Rock Hotel & Casino Hollywood na Florida, unda e evento di Diadomingo anochi tambe a tuma lugar.
Diabierna anochi, tabata e momento cu Helen tabata anhela asina hopi pa mustra cu ademas di inteligencia y beyeza, e por domina pasarela cu tur facilidad.
E anochi a cuminza cu Helen bisti cu un color roos di e diseñadora Sherri Hill, te cu su exquisito pasarela den trahe di baño color geel, y su elegancia cu su trahe di gala. Helen a divulga riba Social Media cu e mes a escoge e color cora ey, pa candela y pasion.
Cu seguridad, confianza, y cu sonrisa constante, e dama hoben di 20 aña di edad a demostra cu e ta sigur di su mes. El a subi escenario cu su cabey los, y aki por a mire cu e tabata luci comodo. Su trahe di “Alma di Candela” a ser diseña pa Richard Ramirez.
Potretnan pa cortesia Benjamin Askinas.
https://diario.aw/fr/categories/noticia/general/helen-hernandez-di-aruba-a-luci-comodo-cu-su-trahe-di-gala#sigProIdc2bd3f1b46
