ORANJESTAD (AAN) – Cindy Kelly-Mathilda, director di ATHA (Trabao pa Hubentud Aruba), a menciona,
pa finaliza e conferencia di prensa tocante e proyecto Gen297, cu esaki ta un proyecto piloto cu ATHA tin pa un aña, teniendo como sede Centro di Bario Brasil.
No obstante, nan tin un plan estrategico pa cinco aña unda cu nan tin pensa pa expande den cinco bario. El a comenta cu na momento cu nan a haci bishita na scolnan pariba, e reaccion pa e programa Gen297 tabata hopi positivo, y hasta ATHA a haya pregunta si tin posibilidad pa sinta hunto y papia over di e posibilidad di programa na scol mes.
“Si e mesun programa aki nos por guia of yuda na un manera pa join pa haci esaki na scol. Mi tin cu bisa cu no ta nos plan awo; nos tin e fondo pa un aña, kiermen durante un aña nos ta ofrece esaki y e ora ey nos ta mira kico mas ta bin y kico mas ta sali di e proyecto.
“E ta un programa financia pa sesenta hoben, na Centro di Bari Brasil, y si na un momento nos mester papia di expande esaki, e ora ey tin cu bay sinta un biaha mas pa wak e fondonan pa por cubrie. Manera nos a bisa, e ta inclui tur cos. E hoben tin cu yega y bin cu su material, pa e momento cu e tin cu haci su tarea, y tur e otro actividadnan ta wordo cubri di e suma cu e mayor ta paga pa luna”, Cindy Kelly a menciona.
El a remarca cu e hobennan no tin cu presenta cu ningun instrument, papel ni nada extra. Tur cos ta wordo cubri, incluyendo e cuminda cayente.
“Nos sa cu despues di scol hopi hoben no ta ricibi un cuminda cayente, pesey nos a percura pa cubri esaki den e programa” Cindy a agrega.
