Reina Máxima celebrando awe su 50 cumpleaño y a saca algun potret special pa esey

ORANJESTAD (AAN): Reino Hulandes ta di fiesta awe Dialuna 17 di Mei 2021.  Esey ta debi cu Reina Máxima ta cumpli su di 50 aña.

   Hulanda lo ta hisando bandera awe tur caminda pa festeha su fecha natal.  Dependiendo di e condicion di tempo awe, Máxima toch tin un programa basta druk hinca den otro.

   ENTREVISTA: Reina Máxima por wordo mira awe den un entrevista grandi na TV.  E lo bay sinta na mesa cu e rey di talkshow na Hulanda, esta Matthijs van Nieuwkerk.

   E entrevista yama “NOS Máxima” entre nan dos a socede na Paleis Huis ten Bosch y ta wordo transmiti awe Dialuna pa 2:35 pm (ora di Aruba) na NPO1 canal 91, of por mire Dialuna pa 8:35 pm (ora di Aruba) na NPO1-HD canal 351.  A ser bisa cu e lo bay ta un combersacion di curazon habri encuanto bida, amor, y trabao.

   MESUN SERIE: Na honor di su di 50 cumpleaño, Reina Máxima lo por wordo mira den su propio TV-serie.  “Dionne Stax lo haci den su programa ‘Dionne Dichtbij Máxima” un viahe door di bida di Reina y ta conoce na caminda diferente hende y experto cu conoce Máxima basta bon.  Dionne lo viaha rumbo pa e.o. Buenos Aires, New York, y Bruselas.

   E prome episodio a pasa Dialuna caba y a acapara hopi atencion.  Toch esnan cu a mira e serie tabatin un solo reclamo di e televidentenan, esta e forma con Dionne ta menciona e nomber di Reina.  Envez di Máxima, e ta bisa den ingles esta Méxima.  E di dos episodio lo pasa despues di e entrevista di NOS Máxima.

   RTL BOULEVARD: Ayera den un programa special di canal RTL, a pasa un RTL Boulevard Special unda a papia cu varios experto di cas real riba e bida di Reina.

   Den e show, nan a papia extensamente y mustra imagennan di su hubentud te na e rol cu e tin awor como e miembro di mas popular di Cas Real.  Tambe a papia riba tereno di moda y beyeza, riba tur ins and outs di Máxima.

   POTRET NOBO: Ta asina cu Casnan Real hopi biaha ta comparti un potret nobo pa eventonan special.  Y esey ta exactamente loke Reina Máxima a haci tambe. E biaha aki ta RVD (Rijksvoorlichtingsdienst) ta esun cu a suministra varios potret nobo di Reina Máxima.

   E potretnan aki a wordo saca na comienzo di luna di Mei door di Rey Willem-Alexander mes.  Cu su camera den man, el a saca e 3 potretnan di Reina Máxima den e hardin di Paleis Huis ten Bosch.

   MESUN STAMPIA: Reina Máxima lo ricibi na honor di su di 50 cumpleaño, su mesun stampia.  Por corda cu Rey Willem Alexander tambe a haya esey ora cu el a cumpli 50 aña.

   E biaha aki, e serie di stampia “Koningin Máxima 50 jaar” ta conta cu cinco stampia.  Particular di tur esaki ta cu mey-mey di nan tin un potret priva (for di e aña cu el a conoce su futuro casa) poni.  Esaki casi nunca a yega di socede.  E stampianan aki cu e potretnan di Máxima ta obtenible desde awe Dialuna 17 di Mei 2021.

   BOLO: Special pa su cumpleaño, ya caba ta sperando riba e bolo tipico di Argentina, conoci como ‘Alfajores’.  Den pasado hasta Cas Real a yega di comparti potret di Reina Máxima cu e bolonan aki, y a hasta inclui receta con pa traha e postre delicioso aki.

   OUTFIT: Hopi ta sperando pa mira ki trahe Máxima lo bay bisti riba su di 50 cumpleaño.  Esey ta loke mayoria di fanaticonan di Cas Real ta sperando riba dje.  E lo bay ta kizas un diseño trendy di su cas di moda favorito Natan.  Esey ta di bay mira awe.  Pero awe tur hende lo bay canta Lang Zal Zij Leven na Máxima!  Masha pabien.

   E potretnan aki tur pa cortesia:  © RVM - Z.M. de Koning.