FCCA a uni na e accion di Dia Nacional di Cuida Aruba

ORANJESTAD (AAN): Riba Diasabra cu a pasa, FCCA tambe a forma un team bou di guia di su

Director Financiero y Asuntonan General sr.Giovani Anthony y coordinacion di profesionalnan di departamento di ‘Woon-en wijkbeheer’, pa asisti den algun di e barionan di FCCA

   For di tempran e ploegnan a sali pa bario di Bushiri Pos Chiquito, Sabana Basora Noord & Kavel, Sero Patrishi, Cura Cabay Zuid y Juana Morto Complex pa yuda den e accion di Cuida Aruba.

   Un gran cantidad di e habitantenan di e barionan di FCCA a haci nan cas y bario limpi y e personal di FCCA a yuda pa hiba e desperdicio den un di e bakinan di sushi mas cerca di e bario. E habitantenan di e barionan a keda masha contento cu e ayudo aki di FCCA, ya cu algun no tin transporte pa por a hiba e sushinan.

   FCCA ta enfoca riba mantencion di su barionan y ta organiza tur aña minimal dos bez pa aña un accion di limpiesa den barionan cu mas mester. E profesionalnan di ‘Woon-en Wijkbeheer’ di FCCA  continuamente ta conscientisa e habitantenan di e barionan di FCCA e importancia di tene nan cas y nan bario limpi. Un bario limpi ta mehora bo calidad di bida y ta na bienestar di nos comunidad.

   FCCA ta gradici tur su coleganan cu a bin yuda duna un man durante nan dia liber pa asina asisti e habitantenan di  e barionan di FCCA. Alavez FCCA lo continua pa inculca e importancia di e habitantenan pa tene nan cas y bario limpi. Ban sigui cuida nos pais. Un Aruba limpi ta responsabilidad di cada un di nos.