Aruba y Peru ta explora cooperacion den sostenibilidad

ORANJESTAD (AAN): Prome Minister Mike Eman a participa na un mesa rondo cu representantenan di diferente organizacion y compania peruano cu tin sostenibilidad halto riba nan agenda.

E encuentro a tuma luga na residencia di Reino Hulandes na San Isidro, Lima, hunto cu embahador Alexander Kofman. Entre e participantenan tabatin Albina Ruiz, ex minister di medio ambiente di Peru y fundadora di Ciudad Saludable, y Pedro Gamio, ex viceminister di energia, profesor na universidad y consultant  den sector di energia renobabel.

   E grupo di empresario y experto Peruano comprometi cu desaroyo sostenibel a forma parti di un combersacion ameno. Durante e mesa rondo, e participantenan a explora posibilidadnan pa Aruba y Peru uni esfuerso den e temanan esencial manera maneho di awa, energia renovabel, cuido di naturalesa, economia circular, cambio climatico, turismo sostenibel y maneho di desperdicio.

   Albina Ruiz a califica e encuentro como interesante y a destaca e importancia di pone bienestar comun riba agenda di estado. “Mas hende comprometi cu bienestar comun lo haci cu proposicionnan pa yega na sostenibilidad por flui mihor. E tipo di experiencia aki ta hopi importante”, Ruiz a declara. Segun e ex minister di medio ambiente, Aruba tin reton particular como un isla cu ta ricibi un cantidad grandi di turista, especialmente den tereno di maneho di desperdicio.

   Na mes momento, e ta mira diferente tema den cual Aruba y Peru por siña di otro. “Peru por siña hopi di Aruba. Na mes momento, nos por comparti experiencia den energia, maneho di desperdicio, turismo, awa saludabel y tratamento di awa residual. Si nos ta para hunto na banda di sostenibilidad, esaki lo ta mihor pa tur hende”, Ruiz a bisa. el a menciona tambe cu Reino Hulandes ya a sostene Peru cu asistencia tecnico den diferente area. Pa Ruiz, tanto Peru como Aruba mester sigui inverti esfuerso den e relacion, pa por converti e dialogo den cooperacion concreto. E a considera presencia di Prome Minister Eman na Peru como un paso importante den e proceso aki.

   Pedro Gamio tambe a expresa satisfaccion cu e resultado di e encuentro. Segun e ex vice-minister di energia, e reunion a permiti e participantenan analisa con Aruba y Peru por uni nan experiencia y capacidad. “Nos a mira e posibilidad pa uni esfuerso rond di temanan asina esencial pa bida manera awa, naturalesa y desperdicio solido. Ser humano mester bira mas amigabel cu e fuente di bida, cu ta naturalesa”, Gamio a declara. E ex vice-minister a indica cu sostenibilidad ta directamente relaciona cu sectornan manera energia, mineria y turismo. Turismo ta un area cu ta uni Aruba y Peru, ya cu ambos destino tin recursonan natural y cultural cu mester wordo proteha.

   “Aruba tin hopi turista y playa bunita, pero Peru tambe tin hopi cos pa mustra. E union entre nos por contribui na un mundo mihor”, e ex vice-minister a bisa. Gamio a destaca tambe e bon disposicion di Prome Minister Eman y e oportunidadnan cu tin pa desaroya actividad economico sostenibel entre ambos pais. Segun Gamio, experiencia y aplicacion di bon practica tin un balor grandi den e economia actual. “Peru tin hopi pa haci y Aruba ta un ehempel di esfuerso. Ademas, Aruba tin e asistencia tecnico di Reino Hulandes, cu ta uno di nos cooperantenan mas importante den tema di sostenibilidad”, Gamio a declara.

E mesa rondo a forma parti di e programa oficial di Prome Minister Eman durante su bishita na Peru pa e instalacion di Keiko Fujimori como presidenta di Republica di Peru. E encuentro na residencia di Embahador di Reino Hulandes a sinta un base pa sigui explora intercambio di conocemento y posible cooperacion entre Aruba y Peru. E meta ta pa transforma e relacion den proyectonan cu por contribui na un futuro mas limpi, responsabel y sostenibel pa ambos pais.

   Participantenan na e mesa rondo: Ademas di Prome Minister Mike Eman y embahador Alexander Kofman, e siguiente personanan a participa na e encuentro: (*) Adriana Quiros, especialista den sostenibilidad, comunicacion y asuntonan corporativo. (*) Albina Ruiz, ex ministra di Ambiente di Peru y fundadora di Ciudad Saludable. (*) Maritza Montero, prome vicepresidenta di Camara Nacional di Turismo di Peru, CANATUR, y president di Peru Travel Mart 2026.  (*) Pedro Gamio, especialista y consultor den energia y ex viceministro di Energia di Peru. (*) Oscar Caipo, director di CEDRO y anterior presidente di CONFIEP y Peru Sostenible. (*) Cecilia Benavides, directora ehecutivo di RESPONDE Sostenibilidad. (*) Nathalia Arce, gerente general y subdirectora di Revista Stakeholders. (*) Hania Perez de Cuellar, directora ehecutivo di PDC Consultores y ex ministra di Vivienda, Construccion y Saneamento di Peru.