Panaderia local a obtene dos premio grandi di Caribbean Baking Awards

‘Best Bakery Shop of the Year’

ORANJESTAD (AAN): Bon noticia pa gerencia di T2Pan Sourdough Boutique di Aruba, como cu nan a logra di obtene dos premio grandi.

   Nan a haya trofeo di “Best Bakery Shop of the Year”, y tambe premio pa “Best Bread or Dough-Based Product”, den un competencia unda en total 17 otro isla a participa.

   Riba e potret aki por mira e propietaria y e catalizador tras di e compania, esta Zaida Everon.

   E ta contento cu e dos trofeonan y titulonan ricibi, pero e ta desea di gradici henter su team, esta tur hende den cushina, cu ta bende cu clientenan, esnan cu ta yega mainta trempan, pa nan disciplina, nan cuido pa cada pan.

   Tambe ta manda danki na su famia, cu a sigui sostene durante e oranan largo, y e anochinan maratonico di trabao.

   Fuera di esey e ta gradici tur hende cu ta drenta nan tienda pa cumpra y comparti pan na nan mesa, y cu ta confia nan produccion tur dia.

   DIARIO tambe ta felicita Zaida y su compania T2Pan Sourdough Boutique cu e gran logro aki.  Pabien.