Fase 1B di Gateway 2030 na Aeropuerto ta inclui un ‘gate’ nobo y un plaza comercial

ORANJESTAD (AAN): E proyecto Gateway 2030 na aeropuerto ta den full swing, unda cu ta bay bin ampliacionnan importante.

Recientemente DIARIO y otro miembronan di prensa a logra entrevista Gerard Turk, kende a wordo contrata pa Ace Engineering y ta encarga cu e proyecto.

El a splica cu e proyecto Gateway 2030 a wordo adapta na dado momento debi entre otro na e pandemia di COVID-19, unda cu por ehempel trahadornan di e contratista internacional no por a drenta Aruba debi na e virus.
Turk a indica cu e proyecto a wordo parti den diferente seccion y e mes a cuminza na Juni como ‘Resident Engineer’.

“Actualmente nos ta trahando riba Fase 1A, cu ta ampliacion di e check-in hall existente di aeropuerto y tambe construccion di un ‘baggage handling hall’ completamente nobo, incluyendo tur sistema”.

E sistemanan aki ta increiblemente moderno y ta sistemanan cu bo no ta wak ningun otro caminda den e region aki, segun Turk.

El a splica tambe cu desaroyonan den e parti aki di proyecto ta haci e proximo fasenan posibel,

Segun Turk, ora cu keda cla cu e edificio nobo, esun bieu por wordo basha abao.

“Cu esaki e capacidad di e sala di check-in ta bira dobel”, segun Turk, kende a indica cu e parti aki di proyecto (1A) ta bay dura te 2023, pero cu mientrastanto ta trahando tambe riba e proximo fasenan.

Fase 1B tin di haber cu un gate nobo, mientras cu lo construi tambe un plaza comercial.

Sinembargo ainda tur cos rond di e parti ey di e proyecto ta curu segun e ingeniero.