Mescos cu exigencia uniform mester por dicidi riba vacuna --- *Hulanda a bira victima di loke gobernantenan a yama crimen --- *Hende cu ta cuida no por bira vicima di amantenan di Covid-19
ORANJESTAD (AAN) — Na final di 2020 mundo a pensa cu recuperacion solido lo por a cuminsa na final di 2021, pero esaki no tabata e caso.
E motibo principal cu paisnan cu a haci gastonan enorme pa por a vacuna pueblo na tempo, ainda ta den gara di Covid-19, ta simpel.
Covid-19 tin un grupo di amante, di personanan cu stima e malesa asina tanto, cu nan ta trapa riba ley y riba bida di hende cu si stima nan bida y ta haci sacrificio grandi pa asina evita nan destruccion dor di Covid-19.
Loke ta pasa na Aruba actualmente ta contra e base legal di Aruba, cu ta un estado di derecho cu ta proteha hende cu ta tene nan mes na orden y na ley y ta persigui personanan cu kibra orden y regla.
Manera na hopi occasion DIARIO a trece dilanti, democracia ta mara na reglanan pa un totalidad di hende y dictadura ta haci cu por deshaci di e base aki pa asina complace hende cu ta atenta contra bida di otro.
Como ehempel di libertad y libertinahe, DIARIO semper a presenta luz di trafico, cu ta exigi un chofer para pa asina evita cu e ta percura pa su propio morto of otro tipo resultado tragico pero tambe pa morto di hende cu ta tene nan mes na e leynan di luz di trafico.
Si un persona destrui bumper di otro auto, e mester paga. Si un persona causa morto di otro persona pasobra e ta hiba peliger di morto pa e persona, ley no ta castiga e persona cu ta plama peliger di morto.
Durante ultimo simannan, na Hulanda a keda demostra kico ta abuso di hende contra hende.
Hulanda cu ta yama su mes un paraiso di democracia a base di su grado haltisimo di tolerancia, a papia di “crimen” ora gruponan di Hulandes a prefera di haya Covid-19 y a pidi hende contagia nan cu Covid-19, pa asina nan no mester vacuna.
“Criminal” tabata loke gobernantenan di Hulanda a yama e actitud aki y awe hende ta muri atrobe na Hulanda y tur lugar na mundo, cu a wordo paralisa, pa motibo di personanan cu no kier vacuna.
Empresa priva y propietarionan di negoshi priva ta un grupo cu ta sufri bou di e situacion actual na Aruba, cu no ta haci posibel pa un doño di negoshi por manda un trahador cu no kier vacuna cas.
Reglanan di democracia ta wordo impone riba hende cu a hinca nan placa personal den un negoshi pero mester bira victima di Covid-19 pasobra un trahador stima Covid-19 y ta nenga di vacuna.
Cu un version nobo di Covid-19 lo a presenta, tur hende por a spera den un mundo di abuso y dictadura di hende cu no kier vacuna pero si kier abusa di hende cu a vacuna.
Oficialmente e ultimo ola di Covid-19 a wordo yama Pandemia di personanan no vacuna, cu por plama morto hasta na empresanan caminda propietarionan mester cera nan boca y no por actua.
DIARIO a papia cu expertonan legal cu a mustra cu nos sistema di trabou conoce uniform na cual trahadornan mester tene nan mes.
Un empresa ta exigi hende cu ta traha den cushina, tapa cabez y bisti handschoen.
No por ta, cu un persona por bira menasa pa bida den sector priva.
Mientras Covid-19 ta destrui economia y hende, na Aruba e momento a yega pa autoridad proteha bida di hende cu kier cuida nan mes y negoshinan haya permiso pa exigi nan trahadornan vacuna, si nan kier keda den nan servicio.
Mester crea espacio pa hendenan vacuna acudi sin core e riesgo di topa cu amantenan di Covid-19 cu ta plama e enfermedad y ta arma mortal contra hende cu ta sigui regla y proteha nan mes!
