ORANJESTAD (AAN)—Como titular di e cartera di Turismo, ademas di Salud Publico, Minister Dangui Oduber a trece dilanti den reunion di Gabinete Wever-Croes cu Parlamento, su maneho y vision di turismo pa 2021-2025.
E dignatario a expresa cu un di e forzanan di Pais Aruba, ta e amabilidad, cordialidad, y e servicio cu nos hendenan ta brinda na e turistanan, y esaki ta diferencia Aruba di tur e competidornan.
Esaki, Oduber a señala, ta un punto di atencion ora cu el a comparti cu Parlamento e tema di turismo, indicando cu e ta bay enfoca pa mehora y eleva e calidad di servicio, pasobra gobierno kier atrae e turista afluente, esun cu tin un entrada mas halto cu 150 mil dollar pa aña; y e turistanan aki, tin cierto expectativa ora nan bin Aruba. Nan kier un bon nivel di servicio, Oduber a subraya. Nan kier un bon trato, un bon infrastructura, un bon producto cu nan ta bishita, y den cuadro di esaki ta caba tin varios proyecto cu Ministerio di Turismo, conhuntamente cu ATA, ta bay pone atencion riba nan, ta bay enfoca riba un miho infrastructura, upgrading di landscaping y parkeo, pa asina mehora e experiencia di Aruba su bishitantenan. Tin varios proyecto importante den cuadro di esaki, Minister Dangui Oduber a señala. Por ehemplo, e proyecto di Baby Beach fase 2, Rodger Beach, Bushiri Beach, Alto Vista, e proyecto di Hooiberg, unda ta bay crea un ‘outdoor economy’ pa medio di amenities cu ta bay crea pa medio di varios amenities nobo cu ta bay introduci.
E dignatario a bisa cu tur esaki sin lubida dos proyecto cu ta hopi importante den cuadro di e experiencia y servicio cu kier brinda e turistanan: nan ta e proyecto di gateway 2030, cu ta e renovacion y ampliacion di Aeropuerto Reina Beatrix, cu ta un proyecto di 150 miyon dollar, cu ta bay crea casi 500 cupo di trabao directo, ademas ta bay yuda stimula e economia, y ta bay crea entrada pa gobierno. Pues, na final di dia ta bay mehora e experiencia cu e turista tin ora e bishita aeropuerto y Aruba. “Nos tur ta nota cu aeropuerto ta birando chikito, pa e capacidad cu Aruba ta ricibiendo no tin espacio mas pa atende tur e turistanan manera ta desea, y pesey e proyecto Gateway aki ta sumamente importante, pa percura pa ehecute den e siguiente cuater añanan. Esaki sin lubida e proyecto di Port City, cu ta e proyecto na waf di Oranjestad. Ora cu a muda e waf di carga di Oranjestad pa Barcadera, henter e area aki a bin habri pa un desaroyo, y esaki ta un desaroyo di sector priva.
“Gobierno di Aruba mes no ta bay inverti den e proyecto aki, sino cu sector priva ta bay inverti casi 500 miyon dollar, y mescos cu e Gateway ta bay crea cupo di trabao, entrada, stimula economia, duna su contribucion na nos DGP. Nan ta dos proyecto hopi grandi cu nos ministerio ta bay percura pa wordo ehecuta den e proximo añanan”, Minister Dangui Oduber a subraya.
