Fase 1 pa construi rotonde di Palm Beach a cuminza

ORANJESTAD (AAN): E caminda a wordo cera ya for di Diadomingo siman pasa caba! 

Tabatin chauffeur cu ta nada contento cu esey, y nan tabata zundra cu tin asina hopi caminda pa desvia awor.

   Pero djis corda cu e ta un sacrificio awor, pero den futuro lo bay sinti tur e beneficio ora cu un Rotonde bin eynan.

   E construccion aki lo bay dura un poco mas compara cu otro rotondenan, debi cu net eynan tambe tin di bay construi un ‘duiker’ pa awa di rooi pasa bao di dje.  Tambe tin di traha desvio pa tuberianan di awa, wayanan di coriente, y kabelnan di fiberoptic, telefon, y wayanan di CableTV.

   E prome fase ta encera construccion di e prome parti di e rotonde banda pabao, y ya caba e prome siman a nota cu a kita borchinan, tambe algun housing di palonan di luz, y tambe raspa full e caminda bieu y kita esaki, pa asina traha lugar pa pone cabelnan y tubonan na forma corecto bao tera.

   Pa awor, trafico di Playa rumbo pa Palm Beach, por sigui pasa riba e cruzada aki pa sea bay rumbo Malmok of bira bay pa Noord.  Pero trafico di Malmok pa bay Playa tin di desvia.

   DOW tin programa pa e trabaonan di Fase 1 y Fase 2 hunto tuma lugar den 130 dia.  Fase 1 lo dura como 20 siman.