A cende un luz special dilanti di Bestuurkantoor pa conmemora 2 aña di Covid-19

ORANJESTAD (AAN):   Diadomingo anochi, dilanti di Bestuurkantoor a tene un ceremonia special pa asina recorda e 2 añanan di Covid-19.

Durante di esaki a recorda e personanan cu a fayece durante e 2 añanan aki relaciona cu e malesa di Covid-19. Pero banda di esaki tambe a duna reconocimento na e 'front-liners' cu a realisa un trabao extraordinario  pa asina Aruba por a maneha e crisis debidamente.

Prome Minister Evelyn Wever-Croes acompaña di coleganan minister y miembronan di Crisis Team a elabora y reflexiona riba kico e 24 luna aki a nifica pa Aruba y mundo henter.

Mas di 6 miyon persona a fayece rond mundo door di Covid-19. mientras cu aki na Aruba un total di 212 residente a perde nan bataya contra di e virus. Pa recorda nan a cende un luz di speransa,  a pone un ofrenda floral na nan nomber y a tene un minuut di silencio.