Dushi Carnival Group a dispidi di su Reinanan di Carnaval 2025 y a corona esnan di 2026

Durante un evento special cu Irina Croes como presentado:

ORANJESTAD (AAN) Dushi Carnival  Group ta den pleno preparacion pa e temporada di carnaval, y den e fin di siman cu a pasa tabata tin un evento special, den cual Irina Croes, miembro di e Comision y specificamente, den e parti di e reinanan, a haci introduccion di e Reinanan nobo, cu a wordo corona pa 2026.

   Durante e evento aki a introduci y corona e Reina Grandi,  y Señora Carnaval di Dushi Carnival Group, y tambe, cu gran nostalgia a dispidi di e Reina Grandi Tiana y di Señora Carnaval Michelle, di Dushi Carnival Group.

   “Locual cu mesora a capta nos atencion ta nan amor y pasion pa nos festival cultural di mas grandi di Aruba, esta, nos carnaval. Tiana su alegria, animo y simpatia a conkista e corona y haci’e e Reina grandi di Colegio EPI. Bo no a conkista solamente e corona pero sigur nos curazon. Tiana desde nos curazon nos ta desea bo tur clase di exito” Irina Croes a expresa.

   “Michelle, nos señora Carnaval, cu a demostra nos cu ora bo tin hubentud na bo curazon, amor pa nos cultura, bo curazon ta cu carnaval. Michelle a traha hopi duro y e tabata un candidate fuerte p’e corona. Michelle den Dushi Carnival Group su historia ta keda pa semper nos Señora Carnaval”, Irina Croes a señala.

  “Danki Tiana, danki Michelle, boso a engrandece Dushi y a pone nos nomber resona tur caminda”. Irina a remarca.

   Señora Joaly Croes a corona Señora Carnaval 2026, Juf. Younice Dubero-Trapenberg. Tambe a yama padilanti e Reina Grandi di Dushi Carnival Group, Mileisha Barry, ken tabata tin e soño di participa pa Reina di Carnaval, tin basta luna ta preparando su mes, y a desee tur clase di exito. “Conta cu nos apoyo y sosten y nos ta bay p’e tambe”, Irina a expresa.

   Irina Croes a introduci y corona tambe Kyra Jong, cu ta cla pa representa Dushi Carnival Group como Reina Hubenil, tambe completamente cla pa Carnaval 2026.