ORANJESTAD (AAN): Picobello Ice Cream e siman aki a confirma na DIARIO, cu nan ta bay tin un campaña special pa dos luna largo,
y ta un colaboracion cu e respetabel Fundacion Mary Joan, lansando un iniciativa comunitario significante cu e meta pa sostene cuido y concientisacion di cancer di pecho na Aruba.
Pa dos luna, Picobello lo haci un donacion di 10% di tur benta di su 1-liter Strawberry Ice Cream na e Fundacion Mary Joan. E sabor localmente stima lo haya un nificacion mas special ainda.
DIARIO a compronde cu e iniciativa ta resalta e compromiso di Picobello cu responsabilidad social mientras e ta ofrece clientenan un manera facil y agradabel pa aporta na un causa cu ta toca hopi bida. Cada compra di e sabor special ta sostene directamente programanan cu ta asisti individuonan y famianan afecta pa cancer di pecho.
“Nos ta kere den duna bek na e comunidad cu a sostene Picobello pa asina tanto aña,” ta loke Angela Jorink di Picobello Ice Cream a declara.
“E colaboracion cu e Mary Joan Foundation ta permiti nos pa recauda fondonan vital y concientiza, mientras ta trece hende hunto pa medio di algo manera ice cream.”
Fundacion Mary Joan, un organizacion sin fin di lucro respeta na Aruba, ta brinda servicio di sosten esencial, educacion y un plataforma pa pashentnan di cancer di pecho y nan sernan keri. E colaboracion aki lo yuda sigui cu su mision y amplia su alcance riba henter e isla. Clientenan por participa door di cumpra Picobello su 1-liter Strawberry Ice Cream cerca rebendedonan rond henter Aruba durante e periodo di promocion.
Door di disfruta di un cos dushi local favorito, awor comunidad tin e oportunidad pa haci un diferencia.
