ORANJESTAD (AAN): Entrante Diamars 11 di januari, e Operation Mobile Unit (truck) di BRA Bureau Rampenbestrijding tabata den operacion y mainta a cuminza administra sea 1er Vacuna, 2ndo Dosis Vacuna, of e Booster shot.
E biaha aki esaki lo ta staciona na ImSan pa brinda servicio na esnan pariba di brug.
Diamars mainta durante un conferencia di prensa convoca net na e entrada di e Mobile Unit aki, por a nota cu tabatin basta hende para den rij na ImSan wardando nan turno. A pone tent pa proteha nan di solo, y tambe tabatin jug cu awa frieu pa hende bebe.
Prome Ministro Evelyn Wever Croes a hiba e conferencia di prensa den presencia di Rino Hermans di BRA Aruba, como tambe Dr. Joel Raijnherc di ImSan.
DIARIO a nota cu e operacion di e trailer aki no tin ningun efecto riba e operacion di ImSan y tampoco lo bay minimalisa e stacionamento di ImSan. Banda panort di ImSan tin un pida tereno grandi cu a wordo roza, y eyden por para auto trankil.
E trailer aki lo ta operando entre e orario di 8 or di mainta pa 3 or di atardi. E idea pa amplia e orario di 8 or di mainta pa 8 or di anochi pero debi na falta di personal esaki ainda no ta posibel.
DIARIO a nota cu Docter Monica Nuboer tabata cana rond y e ta pendiente di e pashentnan despues cu nan ricibi nan vacuna den 15 minuut, pa wak si tin algun reaccion alergico.
Prome Ministro Evelyn Wever-Croes a enfatiza riba e importancia di e vacuna y booster-shot. El a splica cu e Mobile Unit aki tin e idea su tras, cu e lo bay mobiliza pa varios distrito y bario di e isla pa asina por yega mas cerca di esnan cu kier haya nan vacuna.
Entrante e siman aki, e Booster shot ta di obtenible pa hendenan riba di 30 aña di edad na Aruba. Y como cu e interes ta grandi pariba di brug pa busca vacuna na e Mobile Unit, por spera cu ora e yega na duna Booster shot pa grupo di 18 aña bay ariba, cu e Mobile Unit lo ta na San Nicolas ainda.
