Di 2021 caba e insinerado no mag opera for di Parkietenbos mas

Booshi Wever cu prueba cu huma tabata sali

ORANJESTAD (AAN): E miembro di Partido UPP, esta drs. Booshi Wever a tuma nota recien cu Ministro Arends a duna un conferencia di prensa siman pasa unda el a bisa cu e Insinerado na Dump di Parkietenbos no tabata den funcion.  Pero e potretnan aki ta mustra net lo contrario.

    Wever a bisa cu el a sigui e conferencia ey di Ministro Arends cu hopi atencion, y e ta haya cu e titular encarga e.o. cu integridad atrobe ta laga hopi di desea, pero mas importante ta cu probablemente transparencia lo perhudica e gobierno anterior di POREDmep cu a conspira hunto cu Otmar Oduber pa desangra Serlimar. Pues atrobe e transparencia ta completamente "zoek".

   Riba un pregunta di un miembro di prensa cu si e insinerado ("miskoop") ta den operacion, e minister a escohe pa gaña!  Minister a bisa cu esaki no ta den operacion pa basta dia caba pa motibo cu e filternan mester worde cambia y esaki ta tardando pasobra nan no ta na Aruba ainda!

   Riba e potretnan cu Wever tin, por mira hopi cla cu Diahuebs 21 di Juli e Insinerado tabata den operacion! (e bandera ta indica cu e insinerado ta den operacion) y por cierto na e momento cu e minister tabata papia den e conferencia di prensa e insinerado tabata operando (mira e huma den e di 2 potret)!

   Di con e minister ta gaña? Siendo ta operando e insinerado toch cu filter cu ta sushi, esaki keda malo pa salud di hende, di con ta pone e insinerado traha toch? Esaki te hasta por ser yama un acto criminal!

   Wever kier sa, con bin e minister actual ta defende e deal corupto aki cu alma y curpa y te hasta ta yama esaki uno "state of the art". Di con anto no tin e filternan aki na Aruba mes? E pregunta ta cu si esey tambe pueblo lo mester paga p'e, ya cu pueblo ta paga pa e Diesel cu e insinerado ta usa. Esaki ta e prome prueba di e manipulacion den e conferencia di prensa di e minister aki.

   Riba un otro pregunta cu di con e insinerado ("miskoop") ta sigui opera siendo esaki ta bay en contra di e Ley di Ordenanza di Desaroyo Teritorial (LRO) y ROPV. E minister ta contesta "doodleuk" cu e edificio ey t'ey for di 2007 caba. Pues insinuando cu ami tambe lo a actua contra paso e tempo ey mi persona tabata minister. Pa informacion  di minister Ursell, e tempo ey ROPV NO tabata existi ainda! Wel bay busca otro muraya pa frega bo curpa y purba di tapa e hecho cu simpelmente bo ta actuando deliberadamente contra e Ley di Ordenanza di Desaroyo Teritorial (LRO) y ROPV (2021).

  Enbes di a coregi e eror di ex-minister Oduber, awor ta parce cu Ministro Arends a pone man riba su cabez y pa colmo sigui cu e ola di corupcion cu ta rondona henter e asunto di e compra di e insinerado chikito. Den e ROPV actual (articulo 25.2 sub c), desde 2021, ta poni hopi pero hopi cla cu ta prohibi pa presta e edificio pa uso di procesamento di desperdicio y specificamente na unda e insinerado ta situa (aanduiding Parkietenbos). Y hasta pa usonan ya existente, prome cu 2021, articulo 30.12 di e ROPV ta stipula claramente cu desde 2021 e uso di instalacionnan manera e insinerado no mag opera for di Parkietenbos mas.

   Segun Wever, no por conclui otro cu Minister Arends ta aplaudi y promove violacion di Ley di Ordenanza di Desaroyo Teritorial (LRO) y ROPV (2021).