Mericano y Dominicano a fayece den accident cu avion priva na Puerto Plata

PUERTO PLATA: Diasabra atardi poco despues di 5:00 pm, un avion priva chikito cu tabata bulando for di Miami rumbo pa Puerto Plata,

a cay como 8 km leu for di e pista.  Na final, tur dos persona abordo a perde nan bida.

   E avion priva ta un Cessna T206 cu algun ora prome a lanta vuelo na Opa-locka Executive Airport na Miami cu 2 persona abordo.  El a cay riba un tereno cu ta pertenece na un finca na comunidad di Sabaneta de Cangrejos, conoci popularmente como ‘Cangrejos’, cu ta cerca di e Base Aereo di Forza Aereo Dominicano.

   Esnan cu a fayece ta Josenilton Vasconcelos di 57 aña di edad, di nacionalidad Mericano pero naci na Brasil.  E otro ocupante ta Ofinis Hernandez Plasencia di 33 aña, kende tin un paspoort Mericano pero ta naci na Republica Dominicana.

   Na prome instancia e Dominicano a ricibi golpi y tabata herida, y a wordo transporta pa Hospital. Pero aki e situacion a empeora y el a fayece debi na multiple herida y trauma.

   E avion Cessna tin matricula N210DE, y e vuelo aki for di Opa-locka Executive Miami te na Puerto Plata tin distancia di 750 miya, y lo mester dura 4 ora y mey.  E avion ta pertenece na Tamiami Aircraft Services Corporation.  Autoridad a nota cu e avion tabata yegando pa e final-approach pa e pista di aterizahe, pero den ultimo minuut e avion a perde hopi airspeed, y a baha rapidamente for di halto.