Develo di nomber y logo nobo den cuadro celebracion di 60 aña di Scol Preparatorio Santa Jacinta

ORANJESTAD (AAN):  Diamars 8 di juni Prome Minister Evelyn Wever-Croes tabata presente na celebracion di 60 aniversario di Scol Preparatorio Santa Jacinta.

Prome Minister a expresa cu ta un honor pa den nomber di Gobierno por ta presente na e occasion y a gradici cada docente cu durante 60 aña a traha na e scol.

            Den e 60 añanan di existencia di e scol aki, a forma miles di mucha y a traha e fundeshi pa miles di mucha cu despues a bira hoben y aworaki ta adulto.

            E celebracion di 60 aña di Scol Preparatorio Santa Jacinta a inicia cu un bunita Santo Sacrificio di Misa na Misa Fatima na Dakota. Muchanan hunto cu maestronan, directora di SKOA Juff Anuesca Baly y nos Prome Minister Evelyn Wever-Croes y invitadonan presente a atende e bendicion special aki sigui pa un bunita celebracion na scol unda cu a haci e develo oficial di Jacinta Kleuterschool pa Scol Preparatorio Jacinta na Dakota.

            E motibo di e cambio di nomber ta e hecho cu aworaki Jacinta ta un Santo y esaki ta un experiencia unico. Cu esaki e fecha lo keda conmemora pa hopi tempo mas. Cu e cambio di nomber a bin tambe un logo nobo. Tambe a inaugura un bunita hardin cu e imagen di San Jacinta pa por inculca e FE den nos muchanan.

            “Ora cu docente of cabesante tin un tarea asina pisa pero na mes momento asina noble, e ta haci bo un persona hopi special. P’esey den nomber di Gobierno di Aruba mi ta gradici SKOA, cabesante y tur docente di Jacinta Kleuterschool awo Scol Preparatorio Santa Jacinta, pa e trabou grandi cu ta haci cu e muchanan y pa a yuda forma nos hobennan,” Prome Minister Evelyn Wever-Croes a expresa.