Desde Juni ultimo Mike Petronia ta bringando pa husticia pa su yiu muhe

ORANJESTAD (AAN) – Señor Mike Petronia kier husticia pa su yiu muher cu a bira victima inocente di un tiroteo na San Nicolas, y a priva e hoben di su bida, na luna di Juni di e aña en curso.

Den un entrevista cu DIARIO, Petronia a comenta cu el a combersa cu e Fiscal riba diferente tema, y un di nan ta cu e castigo maximo pa un hoben, no por ta mas cu cuater aña y e por ta menos cu esey.

El a puntra e Fiscal con esaki por ta posible, y e Fiscal a contest’e cu asina e leynan Hulandes ta. Petronia a puntre ta ken tin cu cambia e leynan anto, y Fiscal a bise cu e politiconan tin cu cambia ley. Esey ta literalmente, locual e Fiscal a bisa señor Petronia.

El a referi na un carta cu ex-parlamentario Howell a skirbi pa e Presidente di Parlamento e tempo ey, mr. Ady Thijsen, dia 11 di Juni, net un siman despues di e morto di su yiu.

E carta a encera un peticion publico den Parlamento riba e situacion alarmante di tiroteo, incluso cu morto, den e area di pariba di brug.

E ex-parlamentario a bisa den su carta cu durante e prome seis lunanan di 2021, a constata un cantidad alarmante di tiroteo den e area di pariba di brug, unda lamentablemente diferente persona a perde nan bida.

Den su carta tambe Howell a pidi presencia, den e reunion publico solicita, di e Minister di Husticia, Seguridad, y Integracion e momento ey, pa duna un splicacion di e pasonan corectivo y preventivo cu lo mester wordo tuma pa evita cu e crimennan cruel aki bolbe tuma lugar.  Petronia a indica cu e carta aki, a wordo firma pa señor Alan Howell, señor Rocco Tjon cu awe ta Minister, pa señor Marlon Sneek, y tambe pa Presidente di Parlamento e tempo aya, mr. Ady Thijsen.

“Mientras tanto, gobierno a cambia, nan a firma pa yama e reunion, y e reunion no a wordo yama”, señor Petronia a menciona, agregando cu el a mira un entrevista cu un medio a haci cu e actual minister di husticia, tocante e reunion aki, pero el a bira e contesta. “E pregunta tabata ki dia e reunion ta wordo yama” Petronia a bisa. El a añadi cu, mientras tanto, el a reitera, Fiscal a bise cu e leynan mester wordo cambia door di e politiconan.

“Mi ta bringa no solamente pa mi yiu pero pa tur hendenan. Si ta un yiu di e politiconan kico lo a pasa? E reunion lo a wordo yama? Leynan lo a wordo cambia”? señor Petronia a expresa.

El a subraya pa compronde bon cu e no kier pa a yega asina leu, pero e ta bringando pa algo cu no ta husto. El a sigui bisa cu e Fiscal a bise cu e castigo no por ta mas largo cu 4 aña, 24/7 Petronia ta trahando riba esey y hendenan constantemente ta contact’e. “Mi a haya un documento cu, aparentemente, ta den e leynan Hulandes, cu ta bisa cu un persona di 17 aña por wordo huzga como mayor di edad, dependiendo di e gravedad di e caso. El a bisa cu e tin hechos y e documento na man.

“No ta choca nan a choca mi yiu; ta cu arma di candela nan a yega na su cabes y nan a mate. Kiermen, mi ta bringando pa algo cu e hendenan aki por wordo castiga como mayor di edad”, Petronia a remarca.