Na 2050 mitar produccion petrolero por bay na plastic - Auto di coriente ainda no por reemplasa e auto di gasolin - Loke mester cuminsa cambia ta e mentalidad cu no ta Arubano
ORANJESTAD(AAN)- Manera for di ayera DIARIO a trece dilanti, cu e actual problemanan cu prijs di petroleo a crea, ta debi na e hecho cu pone teorianan bunita riba e realidad di mundo, cu ta lubida cu tur cambio mester di tempo.
Si stop di produci gas y productonan di petroleo cu ta base di funcion na mundo, con por tin coriente?
Cu hende no por biba sin su logronan mas, ta keda demostra na momento cu gobiernonan ta na careda pa evita cu hende mester drumi den friu na paisnan cu no tin gas pa pa trece calor den nan cas por ehempel.
Na Aruba ora temperatura subi manera awor ta e caso, hende ta cende airconditioning.
Ta evita di drenta negoshinan cu ta uza ventilacion lagando nan portanan habri pasobra kier aire friu pa biba, drumi y traha.
Na e momentonan aki edificionan ta wordo construi na un forma cu ventilacion normal no ta funciona.
Paso a paso, comunidadnan mester adapta nan mes na energia alternativa pero tambe hende mester dicidi di asumi nan responsabilidad.
Ora papia di clima y e resultado cu produccion petrolero tin pa hende, mester mira den direccion di plastic, cu sigur ta papia un idioma cla.
Plastic ta material cu a haci su entrada cu cambio di Siglo 19 pa Siglo 20.
Durante e periodo di 1950 pa 2019, plastic a subi di 2 Miyon tonelada pa 358 Miyon tonelada.
Cu plastic un forma nobo di biba a haci su entrada. Un forma di bida, cu sigr ta caba cu naturalesa na tur forma.
Plastic a bira e material moderno cu a reemplasa copi y glas cu antes hende tabata laba y bolbe uza. Awor ta bebe un boter di refresco y tira e boter riba caya.
Piscanan no por landa mas den lamannan yena cu saconan y otro articulonan di plastic.
Den cria, ta topa cu animalnan cu a bira victima di consumo di articulonan di plastic cu ta wordo depone den naturalesa.
Pa problemanan por haya solucion, tur hende mester cuminsa na nan mes.
Nos mester baha e consumo di articulonan di petroleo.
Antes pa un cas tabata tin un auto. Awe tur hende kier nan mes auto. Mester di gasolin.
Ta masha bunita pa papia di auto electrico, cu ainda no por bira un realidad y mester di cambio importante pa bira realidad.
Material cu cual parti di e autonan aki ta wordo traha, tambe ta peligroso. Ainda ta midi e peligro di candela den e vehiculonan aki.
Hende a haci naturalesa su victima despues cu hende a bira victima di su propio produccionnan, cu awe e mester uza na forma responsabel.
Na e momentonan aki 14 porciento di produccion petrolero ta pa plastic. Segun cifranan mita di produccion petrolero por ta pa plastic na 2050, ora mundo ta bisa cu mester a deshaci di uzo di gas, carbon y azeta.
Un responsabilidad nobo ta spera hende, cu un tempo a biba feliz ora e tabata drumi bentana habri.
Awe tur hende kier tin loke hasta nan no tin placa pa paga y esaki entre otro ta conduci na mas ladronicia.
Asina ta yega na e punto cu kier logra. Bida ta responsabilidad y gozo. Hende no por goza sin kier tin responsabilidad hasta pa e calidad di bida cu e ta crea pa su mes.
E defensa di naturalesa ta necesario. Un defensa cu ta responsabilidad di tur hende cu mester ta sincero cu nan mes!
