Crisis tras di crisis ta e suerte di hende cu ta mas cu un voto - Politico cu tambe a yuda subi gasta di Cuido Medico a bay Bonaire - Welga di hamber a mustra kico lider di Gerlien ta pensa di Cuido Medico
ORANJESTAD(AAN)- Cu hende ta pasando den un tempo excepcional, ta algo cu tur ser humano cu sentimento, mester acepta.
Mundo a wordo afecta pa un pandemia, cu a destrui tur normalidad sigur riba tereno medico pa e hecho cu un pandemia ta mishi cu salud di hende.
Ta tristo pa tuma nota con Gerlien Croes ta bolbe subi plataforma pa papia loke e kier bisa acerca di Cuido Medico den e luz politico.
E luznan berde ta bolbe cende pa Gerlien bisa kico por pasa y no por pasa. Nos pregunta ta sinembargo, pakico tur cos ta pasa.
Laga nos bolbe den historia, ora e partido di Gerlien a dicidi di bay uza un concepto di MEP y introduci e Aseguro Medico General na Aruba pa asina e partido di Gerlien haya mas voto.
E concepto tabata di MEP cu no a introduci e ley cu nan a prepara y ya tabata discuti den mundo politico, pa e hecho cu tabata tin basta punto cu no tabata problema pa e partido di Gerlien Croes, cu tabatin mester di un cabay pa core drenta eleccion.
Sin mas, e partido di Gerlien Croes a coy e concepto di MEP pa AZV y a pasa esaki prome cu eleccion. Preparacion tabata un desaster.
Prueba di loke nos ta trece dilanti awe, ta e hecho cu personanan cu tabata tin un seguro priva, casi a bira victima di companianan di seguro y DIARIO mester a lanta para pa splica Pueblo su derecho den un confusion total.
Ta AZV awe ta dicidi pa gasto medico na Aruba, cu manera nos a bisa no tabata tin e maneho cu e mester tabata tin for di momento cu el a wordo introduci despues di a wordo kita for di MEP dor di AVP, e partido di Gerlien.
Si Gerlien ta kere nos ta practica mentira, e mester bay puntra su lider cu a dicidi cu Aruba mester di un hospital caminda hende ta mira cinco strea.
E renobacion di e hospital di Aruba tabata parti di un buki cu e lider di Gerlien a traha pa e gana eleccion. E tabata parti di e storia di Bo Aruba den cual e lider di Gerlien, Mike, a dicidi di bay hunga Superman cu 1.6 Biyon di pueblo.
Tur experto cu papia di e proyecto na forma honesto, ta mustra cu no mester a bay duna bida nobo na e hospital bieu sigur no cu e cantidad di placa, cu a wordo uza sin supervisa naturalmente kico tabata wordo haci.
Aruba ta biba cu e resultado di abuso di placa di Pueblo manera tur cifra ta indica.
Ki balor e partido di Gerlien ta duna Cuido Medico sigur a wordo demostra, ora no ta pashentnan den hospital, pero e lider di Gerlien Croes durante su welga di hamber den Fort Zoutman, a pone henter mundo medico na careda cu abuso di ambulance pa personal di Cuido Medico evita cu e ta muri di Welga di Hamber.
Awe Aruba ta den un pandemia. Aruba, cu a keda sin placa cu a wordo abusa dor di e partido cu ciegamente Gerlien ta sirbi.
Gerlien ta bon na haltura cu no ta Gobierno a bay corta den gastonan medico, pero ta Gobierno Wever-Croes mester a mira con ta bini cu placa pa evita cu AZV lo a bati bancarota hunto cu henter Cuido Medico.
Cu dokternan ta bay Bonaire nos tur sa. Prueba ta e hecho cu Alex Schwengle, cu den e partido di Gerlien a construi e hospital como e Ministro y tambe ta dokter di pulmon, a bay laga e Aruba cu e a yuda laga atras manera e ta, pa bay dirigi hospital di Bonaire.
Esaki tabata su escoho despues cu e como Ministro a laga un Cuido Medico agonizante atras na Aruba.
Si mester publica cifranan di AZV, nos lo haci esaki. Si mester publica formanan cu a busca pa tur gremio yuda soluciona e situacion tempo cu Gabinete Mike Eman tabata na mando, tambe lo haci esaki.
Aruba y henter mundo ta pasa den un crisis den cual bida di hende ta na peliger. Ta tristo cu politiconan cu mester sigui hunga wega pa nan haya voto, ta uza dolor di Pueblo, salud di Pueblo pa wega politico barata.
