Colegio Arubano ta celebra cu orguyo e resultadonan di Examen di HAVO y VWO

ORANJESTAD (AAN) – Colegio Arubano ta orguyoso di celebra e logro di 151 graduado di HAVO y VWO den e prome periodo.

E resultadonan ta refleha añanan di compromiso, perseverancia y trabou duro. Nan ta particularmente orguyoso di e motivacion, determinacion y resiliencia cu e alumnonan a demostra durante nan trayecto escolar. 

Nan ta gradici e docentenan pa nan dedicacion excepcional y pa semper bay un paso mas aya pa guia, motiva y sostene nan alumnonan. Tambe ta expresa sincero aprecio na e personal administrativo y e otro departamentonan; nan compromiso diario ta contribui na e exito di e scol y di e alumnonan. 

Pa e alumnonan cu tin un herkansing ainda, kier anima nan pa sigui cu confiansa. Un herkansing ta un oportunidad adicional pa logra e meta desea. Cu enfoke, perseverancia y fe den Dios y bo mes, bo tambe por logra bo diploma di HAVO of VWO.

Na tur alumno cu a pasa, y na esnan cu ainda ta den proceso pa logra haya nan diploma: "Un capitulo nobo ta na horizonte."

Directora General y Rectorado Colegio Arubano ta felicita tur candidato y hopi exito den e siguiente fase di boso bida!