Minister Geoffrey Wever
ORANJESTAD (AAN): Minister di Finansa, Asunto Economico y Sector Primario, mr.Geoffrey Wever ta informa cu e Prome Presupuesto Supletorio 2026 di Gabinete AVP-FUTURO a avansa pa e siguiente fase di su proceso formal di aprobacion.
Despues cu e presupuesto supletorio a ricibi conseho di e College Aruba Financieel Toezicht (CAft), Gobierno a procesa e recomendacionnan y awo e documento a wordo entrega na e Raad van Advies pa nan conseho.
E proceso ta sigui un caminda cla y transparente. Prome CAft ta evalua e presupuesto supletorio y ta duna su conseho. Despues Gobierno ta tuma e puntonan di atencion y recomendacionnan di Caft den consideracion y ta wordo incorpora den e concepto di e presupesto supletorio 2026 y entrega den un pakete completo na Raad van Advies. E siguiente paso ta pa Raad van Advies, duna su conseho independiente riba e documento. Na momento cu Raad van Advies entrega su conseho, e Prome Presupuesto Supletorio 2026 lo wordo entrega na Parlamento di Aruba.Parlamento di Aruba lo tin e oportunidad di revisa e presupesto y hasi pregunta. Despues di contestacion di pregunta, por progama un fecha pa e tratamento di e presupuesto supletorio 2026.
“Nos ta sigui e proceso legal stap pa stap. Transparencia y disciplina financiero ta e base di e maneho di Gabinete AVP-FUTURO. Cada instancia di supervision ta haya su turno y nos ta tene nan al tanto. E meta ta pa yega na un finansa publico duradero pa beneficio di tur Arubiano,” Minister di Finansa Geoffrey Wever a comenta.
E maneho financiero di Gabinete AVP-FUTURO ta basa riba normanan di presupuesto ancra den e Landsverordening Aruba Financieel Toezicht (LAft). Cumpli cu e ley, mantene dialogo continuo cu e instancianan di supervision y actua cu responsabilidad pa e comunidad ta prioridad absoluto di e gabinete.
E prome presupuesto supletorio 2026 ta refleha e adaptacion necesario na e realidad economico di Aruba den e ultimo lunanan. Gabinete AVP-FUTURO ta continua cu e maneho pa mehora e poder di compra di tur ciudadano. Cambionan den e presupuesto mester a tuma lugar pa entre otro crea e capacidad pa por mitiga e impacto di prijsnan di combustibel a consecuencia di e sitacion di guera den Medio Oriente. Den cuadro di transparencia y responsabilidad, Minister Wever lo tene e publico al tanto di tur avance den e proceso.
