Rish-Ann Ammerlaan, Trahado Social di FCVR
ORANJESTAD (AAN) -- Trahado Social di Fundacion Contra Violencia Relacional (FCVR), señora Rish-Ann Ammerlaan, tambe a elabora den entrevista cu Matutino DIARIO, tocante e factornan cu ta hunga un rol riba e situacion di violencia relacional entre personanan di 19 aña y algo mas. Casonan asina tambe ta presenta cerca e fundacion y esakinan ta alarmante, segun Ammerlaan a relata.
“Tin diferente factor cu ta hunga un rol, pero loke mi ta nota den e guia cu mi ta duna mi clientenan, self-esteem abao, hopi biaha abandono di un tata den bida di un mucha. Y esey no solamente nos ta mira den bida di un hoben, pero mi ta wak den hende grandi cu sinta mi dilanti, cu ta carga un herida di infancia y cu ta bisa ‘mi ta prefera di carga y tolera tur cos cu mi tin cu tolera, pa tin e potret di famia cu mi tabata kier pero mi no tabata tin”, Rish-Ann a comenta.
El a subraya cu importancia di un mayor den e bida di un mucha ta hopi grandi, y si bo no ta traha riba e herida aki, e ta cana cu e persona pa henter su bida largo. “Pues, mi ta wak cu hopi falta di self-esteem, heridanan di infancia, abandono, ta pone cu e personanan aki ta tolera cierto cosnan pensando cu esaki ta amor”, señora Ammerlaan a relata.
Esaki ta cosnan cu e ta haya hopi den e casonan cu señora Rish-Ann ta haya.
