CEDE Aruba contento cu e 2.500 hende cu a bishita Ban Caya na San Nicolas

ORANJESTAD (AAN): Riba celebracion di dia di Rey, CEDE Aruba cu proyecto comunitario ‘Bario Unico’ a organiza e prome “Ban Caya 2024” den San Nicolas.

For di merdia caba tin famianan a cuminsa yega pa e evento pero a scucha cu tabata mas atardi lo cuminsa. Esaki caba tabata duna e bista di e necesidad pa famianan ta hunto den un celebracion asina.

   Pa 4’or a cuminsa cu e diferente actividadnan y informacionnan cu a worde ofreci door di e instancianan (NGOS) cu a forma parti di ‘Ban Caya’.

   E multitud a sa di disfruta di boxing, hotwheels, street basketball, skateboard, rollerblades, dam, volleyball, y RYGF (Reach Your Goal Foundation) cu un tremendo idea pa pone weganan popular en bibo riba caya. Tambe tabata tin Competencia di baseball dunando hopi mucha un oportunidad di hunga den ekipo. Banda di deporte, bishitantenan por a ricibi lesnan di percussion, informacion di EHBO, y informacionnan di diferente instancianan cu ta yuda hoben y famia.

   Tabata tin arte, cultura, bendemento di materialnan door di nos muchanan via Rode kruis, weganan di WAW mobiel hunto cu instructornan di IBiSA y hopi cuminda y ambiente. Loke tambe a resalta durante di e atardi aki ta e forma cu a sera conoci cu e diferente nacionalidadnan cu ta integra nan cultura den San Nicolas. E integracion di nos muchanan cu tin discapacidad mental of fisico cu a participa durante e presentacionnan.

   Un union bunita cu a haci e atardi aki uno special. Centro di Bario Brazil y Centro di Bario Lago Heights ta tin nan informacionnan di tur locual e centro tin pa ofrece na e comunidad di pariba di brug. Un danki sigur na tur instancia cu tabata tey, IBISA cu ta partner di Bario Unico pa e proyecto aki y tur boluntario cu a yuda durante preparacion y ehecucion di e Proyecto aki.

   Un danki na nos sponsornan. CEDE Aruba ta anuncia di biaha e siguiente “Ban Caya” cu ta den Juli den e bario di Dakota.  Sigur hopi danki San Nicolaas.