Segun Ronella Croes CEO di ATA:
ORANFESTAD (AAN): Na momento cu Aruba tin fluhonan di bishitante cu ta hopi eleva, e ta trece congestion y presion na diferente sitio riba nos isla. Na momento cu tin barconan crucero, sin duda e cantidad di bishitantenan cu ta bishita diferente sitio na mes momento, ta crece y ta congestiona e momento ey. Esaki sinembargo, no ta algo di tur dia.
Segun CEO di Aruba Tourism Authority (ATA), Ronella Croes, esaki ta subraya tambe pakico ATA ta hopi presente y ta maneha e producto turistico di cierto manera. “Nos tin pa facilita, trece informacion y ta yuda unda cu por conforme plan di maneho y e presupuesto di ATA.
Segun Croes, tanto pa turismo crucero como pa turismo en general, ATA ta boga y ta para pa stabilisa. El a enfatisa cu e strategia y vision di ATA no ta dirigi necesariamente riba crece turismo proporcionalmente den e maneranan cu a haci esaki anteriormente. ATA, hunto cu APA y Ministerio di Turismo ta den dialogo pa fiha kico esaki kiermeen den cifra pa turismo crucero. Enbes di ta enfoca riba crecemento, ta enfoca riba stabilisa turismo.
El a enfatisa cu Aruba ta bayendo sumamente bon y fuerte. E cantidad di turista cu a bishita Aruba den e prome mita di aña, a crece cu 11% compara cu aña pasa. Turismo crucero a crece cu 7% compara cu aña pasa. Esaki, el a enfatisa ta prome 6 luna di aña sumamente fuerte pa loke ta trata turismo. Tambe, el a menciona cu, segun AHATA, ta loke a paga pa estadia na hotelnan, cu a subi cu 12% compara cu e prome 6 lunanan di aña pasa.
“Esakinan ta indicadornan hopi clave cu turismo a desaroya na un manera fantastico y hopi fuerte dilanti hopi otro den Caribe. Aruba ta e preferencia di destino turistico na e momentonan aki pa diferente otro motibo. Esaki ta un reto di luho. Nos ta premira cu e aña ta sigui fuerte”, señora Croes a señala.
