Aruba hunto cu 7 otro pais ta participa den programa ‘Track4Tip’

Pa combati y castiga traficacion humano

ORANJESTAD (AAN): Recientemente bao auspicio di UNODC (United Nations Office on Drugs and Crime), y den colaboracion estrecho di Centro CMMA (Coordination Center of Human Trafficking and Migrant Smuggling Aruba), a tene un mainta di entrenamento pa periodistanan di Aruba riba e topico delicado aki.

   Na e Centro di Conferencia HIAS Aruba riba Lloyd G. Smith Boulevard, dos experto di UNODC kendenan ta Lourdes Gutierrez Ortiz Monasterio (Caribbean Coordinator), y Lissette Reyes (Republica Dominicana) a bin duna informacion riba e asina yama ‘Track4Tip Program’.

   DIARIO a ricibi e invitacion for di Jeannette Richardson-Baars di Centro CMMA, y a keda sumamente impresiona cu e investigacion y analisis amplio, cu monton di rapport, cu UNODC a produci riba e topico cu tin un embergadura hopi amplio su tras, caminda e violacion principal ta socede riba derechonan humano.

   Den su meta pa por reduci y tambe castiga traficacion humano, principalmente muher y muchanan, protocol contra contrabando di migrantenan via lama, tera, y aire, y tambe atendiendo asunto di droga, terorismo y corupcion, a crea e programa ‘Track4Tip’.

   Esaki ta un iniciativa di 3 aña (2019-2022) implementa pa UNODC, y ta wordo implementa riba ocho pais den Sur America y Caribe, cu accion na e nivel nacional y regional na e.o. Ecuador, Peru, Brasil, Colombia, Republica Dominicana, Trinidad & Tobago, Curaçao, y Aruba.

   E meta di e proyecto ta pa mehora e reaccion riba traficacion humano entre e fluho migratorio entre e paisnan aki, siguiendo un enfoke multidisciplinario y centraliza riba e victima cu ta funciona na nivel regional y local, pa por identifica, preveni, y tambe hiba casonan dilanti Huez.

   Aki tin di corda riba e Declaracion Universal riba Derechonan Humano, unda na punto 3 ta mustra cu tur hende tin derecho di bida, libertad, y seguridad.  Punto 4 ta bisa cu ningun hende tin di bay wordo obliga na bira un esclavo of pa sirbi un hende so.  Punto 7 ta bisa cu tur hende tin derecho di ricibi proteccion contra discriminacion.

   Ademas di trata na combati traficacion humano, UNODC ta recorda tur instancia cu ademas di prevencion di esaki, bo tin di ofrece proteccion na e victimanan di traficacion, door di duna nan rehabilitacion y reintegracion social.  Y alavez corda cu tin di entabla e casonan den Corte pa cu e crimennan di traficacion humano, y reforza e capacidad di autoridadnan investigativo y hudicial.

   Pero den e spectrum di Traficacion Humano no tin poni djis e hecho cu ta yuda un persona cruza un frontera, sea boluntariamente of contra su boluntad.  Tin diferente modalidad aki, e.o. traficacion di hende djis pa por bay saca cualkier organo for di su curpa, traficacion di hende caminda forzosamente ta saca muhernan na estado.  Traficacion di hende unda ta forza un persona contrae matrimonio.  Pero den e spectrum di Traficacion Humano tin tambe: (*) Cualkier forma di explotacion sexual. (*) Cualkier forma di esclavitud. (*) Forza pa bay labora of duna servicio.  (*) Busca muchanan menor di edad pa traha.  (*) Forza hendenan pa bay pidi limosna riba caya. (*) Cualkier tipo di explotacion laboral.  (*) Adopcion iregular di baby. (*) Prostitucion di otronan. (*) Forza hende di bay traha na cas.

    No mester lubida cu traficacion humano ta un di e actividadnan principal di Crimen organiza rond mundo.

   Na final di e seminario, Jeannette Richardson-Baars a gradici e dos expertonan cu a yuda duna prensa di Aruba mas informacion encuanto e programa di ‘Track4Tip’ cu Aruba tambe ta participa na dje.