ORANJESTAD (AAN): Temporada di vakantie grandi a yega y tur preparacion ta kla pa un biahe den exterior.
Departamento di Aduana ta informa biaheronan di nos procedura na momento cu regresa for di exterior.
Procedura na Aduana: E no ta desconoci cu na momento cu biaheronan regresa for di exterior, Aduana por haci un control ariba nan ekipahe. Si durante control nos constata cu facturanan sobrepasa e suma di exoneracion, of e cantidad di exoneracion, nos lo informa e biahero pa e pasa directamente na e oficina di Aduana situa na e sala di yegada na aeropuerto pa paga.
Nan ta pidi biaheronan pa warda tur factura pa asina por calcula e balor di e producto treci. Si acaso e biahero no tin factura, Aduana lo busca informacion online sin tene cuenta cu e biahero lo por a cumpra e producto na un prijs mas barata. Biaheronan tambe por tuma mes iniciativa di haci un declaracion verbal na oficina di Aduana. Por fabor no warda te ora Aduana haci su control riba e ekipahe.
Exoneracion pa productonan di uzo personal: Cada biahero por trece productonan personal cumpra den exterior cu balor di factura di maximo 400 Florin, cual no ta necesario pa paga impuesto di importacion. Articulonan cu sobrepasa e suma aki mester paga impuesto ariba e producto completo.
Exoneracion pa cierto productonan mara na un limite: Corda cu tin algun producto cu limite! Ata aki e lista di e productonan cu ta mara na un limite:
- • 200 pida (1 slof) di sigaria, of 25 pida di siga, of 50 pida di cigarillos, of 250 gram di tabaco.
•• 1 liter di bebida fuerte p.e. rum of whisky, of 2,25 liter di biña, of 3 liter di cerbes.
Pa productonan cu no ta nombra bou di 1 y 2, mester paga impuesto y accijns. Pa por bin na remarke pa e exoneracion ariba menciona, mester cumpli cu algun condicion. (*) E persona mester ta 16 aña di edad bay ariba. (*) E articulonan mester ta pa propio uzo.
Pa productonan importa cu meta comercial of “encomienda”: Aduana ta remarca cu esaki no ta posibel pa articulonan importa cu tin un meta comercial of cu ta trec’ele como “encomienda”.
Pa e articulonan aki nan ta avisa e biahero pa acerca un Customs Broker pa haci e declaracion di e productonan. Comerciantenan por identifica nan compania cu un copia di e registro di Camara di Comercio di Aruba como tambe e persoonsnummer di e compania pa asina por haya un aprobacion pa Invoer Zonder Manifest (IZM verklaring).
Por ultimo Departamento di Aduana ta haci un suplica na tur biahero pa tene cuenta cu e informacionnan comparti, pa asina goza di un vakantie sin preocupacion.
