Segun Mediador Anselmo Pontilius:
ORANJESTAD (AAN) Señor Anselmo Pontilius, Mediador di Gobierno, den su entrevista cu DIARIO a comenta, cu ta hopi leu pa finalmente pa SVb su autoridadnan tin e responsabilidad pa controla, y percura pa e companianan cumpli cu nan responsabilidad, di paga tur luna e prima cu nan ta deduci for di e salario di e trahado y e parti cu e dunador di trabao mester contribui na dje.
“E ta urgente pasobra nos a wak varios caso unda cu e dunador di trabao no ta cumpli pero e trahado ta bao impresion cu si, su prima a wordo deposita na un compania di seguro pa su pensioen”, Anselmo Pontilius a señala.
Pontilius a sigui bisa cu ora e pandemia a dal, SVb por mustra bo cuanto trahado rond di Aruba no tabata registra ningun caminda.
“Mi ta kere awe lo ta menos, pero keto bay nos ta haya informacion cu un cantidad di trahadornan, cu ta den un isla chikito manera nos, ta permiti, of no ta controla, of no kier controla debidamente, y esey mester bira aworaki e tarea mas profundo. E pregunta ta, DPL cu Departamento di Labor, nan so lo ta e autoridad? Of lo por bisa, den pasado nan a forma un Comision di varios servicio cu ta sali bay caya y controla, debidamente e cumplimento di nos leynan, entre otro, den cual e dunador di trabao ta responsabel pa cumpli cu ne”, Mediador Pontilius a señala.
El a expresa cu seguridad na trabao ta algo hopi serio, den cual e consecuencianan hopi biaha ta fatal pa e trahado y su famia.
“Pasobra no ta conta esun cu lo bay paga pa motibo di accidente, pero loke bo por preveni ta conta, y esey ta hunga un rol grandi”, Anselmo Pontilius a señala.
Pontilius no tin duda cu instancia concerni mester actua cu man mas duro.
“Nos por compronde di Labor cu DPL ta den un proceso awo pa bay reorganiza, entre nan so, of nan ta combin’e cu por ehempel, cu e forza di polis y otro departamentonan seguridad; DTI, por ehempel, cu nan ta bay vigila y percura cu mensualmente tin control den tur sector. Bo no por permiti pa cosnan pasa, bo sa cu ta pasando, y bo ta lague continua”, Mediador Anselmo Pontilius a remarca.
