Artistanan Clarence y Jeon a caba di saca un album nobo

‘Koala City’

ORANJESTAD (AAN): Fin di siman ta drenta, cu e bon noticia cu e artistanan Clarence y tambe Jeon hunto a saca un album nobo.  E titulo di esaki ta ‘Koala City’.

   A ser splica na DIARIO, cu e album aki lo bay deleita curason di tur hende. 

   Jeon ta un artista cu tur hende na Aruba ya caba conoce, y sa di su creatividad, su forma di pone musica pega, y constant buscando cosnan nobo.

   E artista Clarence Arduin ta conoci como ‘Clarence’, y ta un artista talentoso di Caribe naci na Hulanda y awor cu su sede na Corsou.  E tin un conexion profundo cu cultura y musica Caribense.  Pasobra lo bo nota cu Clarence ta trece pasion, autenticidad, y emocion cu cada cancion cu e ta crea.

   Specializando den ‘Kompa’, Clarence ta uza musica como un forma pa expresa su sentimentonan y experiencianan cu ta conecta tur hende.  Su sonido a wordo crea rond di amor, pasion, emocionnan real, y e storia di bida di ur dia, transformando sentimentonan genuino den melodianan cu oyentenan ta sinti y ta mira nan mes den dje.

   Cu su estilo unico y acercamento diferente pa cu musica, Clarence ta sigui desaroya su musica mientras e ta representa e espirito vibrante di Caribe.  Su mision ta simpel: Comberti su sentimentonan den melodianan, y crea musica cu ta papia di curazon.

   DIARIO a nota cu e temanan riba e album aki ta “Bunita”, “Mars”, “721”, “Separa”, “Den 8 Billon”, “Kalor”, y “Bebe”.