Eagle LNG por demanda Aruba pa atake contra su reputacion --- Acuerdo Aruba y Eagle LNG ta parti di Acuerdo di Gobernacion --- RAIZ tin relacion directo cu WEB cu a hiba un guera pa Gasunie
ORANJESTAD (AAN)- Loke a pasa ayera na Aruba no tin nomber y manera DIARIO ta insisti, autoridad mester bay investiga kico tin tras di e decision di partido RAIZ, pa laga Aruba keda ridiculo den bista di mundo.
Tabata tristo pa mira ayeranochi, con medionan di comunicacion internacional tabata presenta e informacion cu Eagle LNG a firma un contracto cu Aruba.
Ta trata aki di un contracto cu mester sirbi interes di Aruba, pero na tur forma a wordo ataca dor di dos instancia cu tabata AVP y WEB, e compania di awa y electricidad cu ta propiedad di Aruba y cu tin un relacion directo cu e partido politico RAIZ.
Loke a pasa ayera na Aruba no tin nomber den historia politico di e pais y partido RAIZ ta keda registra como un partido cu ta un berguensa pa Pueblo di Aruba.
DIARIO na varios ocasion a pidi pa investiga e relacion entre WEB, Utilities Aruba bou direccion di AVP y Gasunie di Hulanda.
Prome cu DIARIO a bay imprenta ayera el a wordo informa cu Partido Raiz no solamente tabata bon conoci cu e acuerdo entre Gobierno y Eagle LNG pero cu den e acuerdo di gobernacion e realisacion di e proyecto di gas pa 2024 ta bon splica.
Un investigacion oficial mester wordo habri pa determina kico a pasa.
Pakico RAIZ a forma Gobierno cu MEP cu ta e partido mas grandi di e Gobierno cu a firma un acuerdo cu Eagle prome cu el a forma Gobierno cu RAIZ mester haya un contesta den un situacion di berguensa pa e pais Aruba, cu a keda cu un cara herida.
Es mas. Informantenan den exterior a adverti DIARIO cu Eagle LNG por cuminsa un caso contra Aruba den loke a pasa.
Ta trata di un compania Mericano cu un bon reputacion cu ta wordo afecta awor pa e partido RAIZ, cu ta un hunga un wega nunca bisto den historia di Aruba cu si ta na haltura di e presion grandi cu tabata existi pa trece Gasunie Aruba tempo di AVP.
E compania Eagle LNG segun informantenan internacional por cuminsa un caso contra Aruba ya cu RAIZ ta parti di Gobierno di Aruba, caminda su reputacion a wordo kibra sin splicacion of prueba.
DIARIO lo sigui cu su investigacionnan pa informa Aruba debidamente. Mientrastanto informacionnan publico hasta di Gasunie ta indica cu e instalacionnan di gas por wordo uza den futuro pa hydrogen, cu cual actualmente Gasunie, segun publicacion internacional, ta haci bon negoshi!
