Aruba a perde wega pa tercer luga na World Series di Little League

WILLIAMSPORT: Despues cu e seleccion di Little League di Aruba a perde nan wega Diasabra contra Chinese Taipei cu e score di apenas 1-0,

nos muchanan Diadomingo a hunga e wega pa tercer lugar contra Connecticut.

Aruba tabata falta djis un hit cu dos out cu coredornan na segunda base Diasabra, pa gana e wega y pasa pa e gran final.

Diadomingo Aruba den prome inning a logra di para un menasa grandi ora cu Connecticut a yena base, pero den di tres inning e ekipo Mericano a anota 3 careda.

Aruba a contesta cu 2 careda den mesun inning y tabata cerca di empata, pero na final e wega a caba 4-2 na fabor di Connecticut cu a termina na di 3 luga.

Mester bisa cu tanto e ekipo di Connecticut y sigur tambe e ekipo di Aruba a resalta pa e cantidad di hopi bon hugada cu nan a haci.

Aruba a ricibi hopi elogio for di prensa internacional y comentaristanan di ESPN.

E seleccion di Aruba a planta basta respet cu e 3 homerunnan cu nan a bati durante e torneo, como tambe pa e hecho cu Aruba a anota bastante mas careda compara cu locual nan a permiti.

Aruba a marca historia door di pa prome biaha caba na di 4 luga di un Little League World Series, despues di gana 4 wega y perde 3.

Hopi experto a cuminsa ripara y menciona caba cu diferente di e hungadornan di Aruba si nan sigui dedica nan mes na e deporte di baseball, por yega leu y kizas logra un carera den esaki.