Trabao a cuminza pa traha rotonde chikito na cruzada di RCA Arena

ORANJESTAD (AAN):  Riba Dialuna, e pida caminda di Playa pa Tanki Leendert, na altura di RCA Arena den Kamerlingh Onnestraat a wordo cera.

   Esaki a wordo haci pa asina recap e trabao malisimo cu un contratista local a haci cu e pida caminda di Tanki Leendert djis pa pasa tuberia di riolering bao asfalt pa yuda FCCA conecta e Casnan di Pueblo di Sero Patrishi riba e red di riolering.

   Pero e caminda a wordo cera tambe, pa asina bin cu un rotonde chikito na e cruzada di Kamerlingh Onnestraat y Hubadastraat, pues e cruzada banda di RCA Arena.

   E cruzada aki lo keda cera di dia y anochi, y lo dura como 2 siman pa keda cla full cune.  E rotonde lo bay ta similar cu esun cu tin banda di Banco di Caribe.