DEN HAAG: Hopi Surinameño biba na Hulanda ta preocupa pa cu e situacion na nan pais natal, unda Hospitalnan awor ta full na capacidad.
Na diferente lugar na Hulanda awor a tene accion pa pidi donacion di famia y amigonan.
For di combersacion cu specialistanan medico na Suriname, a sali na cla cu tin scarcedad eynan di remedi cu ta alivia dolor y reduci keintura. Pesey na Hulanda, e organizacion SEWA1473 a cuminza cu e accion pa pidi donacion di pueblo “Paracetamol 4 SU”.
Cu esaki, nan kier manda pa e grupo mas vulnerable di Suriname, cu caha di Paracetamol pa asina yuda suavisa nan cu ta haya e prome sintomanan di Coronavirus. E accion a hasta haya cobertura di noticiero di NOS.
Hulanda a yuda Suriname hopi pa combati Covid-19, y a manda como 700.000 vacuna contra Covid-19, toch tin hopi scarcedad di remedi.
