Dos sacudimento di tera
ORANJESTAD (AAN): Tabata Diasabra anochi cu dos temblor a wordo sinti na Aruba. E di dos a socede como 13 minuut despues di esun inicial. Varios hende a raporta cu nan a sinti esun prome, y ta djis un par di hende so a indica cu nan a tende y sinti e di dos.
Prome temblor: Diasabra anochi trempan pa exactamente 6:36 pm, cu un temblor basta fuerte, cu a sacudi piso, sacudi bentana y porta, y laga daknan di zink keda tril a wordo registra. Otronan a bisa cu nan dak a kraak, y algun a mira wandmeubel den sala a sacudi.
E ta uno mas fuerte cu a wordo sinti ultimo añanan! Diferente ciudadano a raporta cu nan cas a tembla completamente, y otronan a bisa cu nan a tende e sonido masha fuerte mes. Ningun informe a drenta si acaso a mira scheur aparece den muraya.
Hendenan a raporta cu nan a sinti esaki na Macuarima, Noord, Jaburibari, Oranjestad, Sero Blanco, Tanki Leendert, Tanki Flip, Ponton, Kudawecha, Monserat, Palm Beach, Washington, Turibana, Boroncana, Alto Vista, Westpunt, Matividiri, Matadera, San Fuego, Sabana Basora, Yamanota, Santa Cruz, Kurimiauw, Mabon, Paradera, Marawiel, Piedra Plat, Cura Cabay, Watapana Gezaag, Kiviti, Rooi Koochi, Sero Preto, y San Nicolas.
Di dos temblor: Poco rato despues, a bolbe sinti un sacudimento di tera, y esaki tabata 6:49 pm. Esaki tambe a tril bentana, a sinti dak ta kraak, y vloer ta tembla. Cachonan a cuminza blaf mesora. Toch esaki ta parce di ta uno di intensidad reduci, compara cu esun prome.
Oficialmente tin nada: Posiblemente e epicentro di e dos temblor aki tabata “demasiado leu” y di poco intensidad pa e fuente oficial di Funvisis (na Venezuela), y SGC (na Colombia) check e registro.
Funvisis mes no ta preocupa si acaso e temblor ta menos di magnitud 3.0º. SGC di Colombia ta raporta sismo bao di 3.0º, pero si e epicentro ta demasiado leu for di nan costa, nan no ta hinke den registro.
Hecho ta cu temblor fuerte a keda registra Diasabra anochi na Aruba, y lamentablemente ningun sismogram y accelerometer ta instala mas na Aruba, pues nos mes no por trianguliza y obtene e epicentro tampoco. Pues ningun hende sa di e magnitud di loke a socede Diasabra anochi.
