Jeanmiree van der Werf di Fundacion Respeta Mi:
ORANJESTAD (AAN) – Jeanmiree van der Werf, funcionario di Fundacion Respeta Mi, ta forma parti di e 'Content Group' (Grupo di contenido) di e 'Toolkit' destina pa uso di e profesionalnan cu ta traha cu mucha sea di manera direct of indirectamente.
E 'Toolkit' ta un caha di herment digital cu profesionalnan por uza na momento cu ta sospecha cu tin abuso di mucha, pero no solamente ora tin sospecha sino pa ta mas preventivo tambe, unda e profesional, proactivamente, ta bay busca informacion di por ehemplo, kico ta e cosnan cu mester tene cuenta cune ora di señala abuso di mucha; kico codigo di proteccion, of por ehemplo kico ta e maneranan cu por acerca mayornan of e muchanan, ora cu tin sospecha.
“Pero tambe, parando keto na e profesional mes, su mesun norma of balor con e ta wak abuso y negligencia di mucha. Ademas di esey, nos a para na un punto hopi importante, pasobra tin biaha profesionalnan mes cu ta traha cu casonan di abuso di mucha, of duna guia na famianan, nan mes tambe ta experiencia, bo por yame ‘un trama secundario’ di e cosnan cu nan ta wak”, van der Werf a señala, agregando cu e 'first responders' tambe ta wak cosnan hopi “erg” ora nan ta bay den seno familiar, y esaki ta un punto cu tambe nan ta bay duna atencion den e 'toolkit.
El a remarca cu e Codigo di Proteccion ta pa tur mucha di 0-18 aña, mirando e Derecho di Mucha tambe, cu ta bisa cu di 0 pa 18 aña bo ta wordo considera un mucha.
El subraya cu cada instancia cu ta traha cu codigo, nan mes tin nan grupo meta y tin cu ta pasa e grens tambe, pues e ta depende.
Pero e Departamento di Mucha y Hoben cu ta coordinando e Codigo di Proteccion den su totalidad, tambe ta encarga y ta maneha parti di e content group y e 'toolkit' digital.
Jeanmiree a expresa cu no pasobra un hoben ta cumpli 18 aña ya no tin atencion pe mas, sino cu nan ta wak tambe e famia. Por ta nan tin tambe emocionnan familiar.
