ORANJESTAD (AAN) – Marguerita Wever, Hefe di Seccion di Educacion y Presentacion di e Arkeologo Harold Kelly a convoca un conferencia di prensa na Museo Arkeologico Aruba den cual el a duna e siguiente informacion.
Marguerita Wever a informa tocante algun actividad publico cu lo wordo realiza den e luna di Juni en curso, den cuadro di un “field school” (practica riba veld) cu ta tumando lugar actualmente cu cuater studiante di Arkeologia, di Universidad di Leiden, y cu ta
haciendo nan practica bao guia di e Arkeologo Harold Kelly.
Wever a splica cu Harold ta candidato na Doctorado y e ta haciendo un PhD, den cuadro di cambio di clima y razgonan arkeologico y ta forma parti di un proyecto internacional y multifacetico. E ta guiando e studiantenan pa tres siman. El a introduci e studiante Arubiano Naomi Wever, cu ta studiando Arkeologia na Leiden, hunto cu tres studiante Hulandes. E tres studiantenan aki ta enfocando riba e region di Caribe, y esaki ta e prome biaha cu nan ta haciendo un practica den veld (field school) den Caribe.
Marguerita Wever a menciona cu durante cu e tres studiantenan aki ta coriendo nan stage na Aruba, Museo lo bay brinda tambe oportunidad na publico pa intercambia informacion cu e studiantenan, y participa activamente of observa un parti di e trabao cu nan ta bay haci.
“E trabao di limpieza y material arkeologico ta rekeri hopi cautela. Pa haci esaki un grupo limita di interesado lo haya oportunidad di haci e trabao aki, bao guia di nos Arkeologo Harold Kelly y e studiantenan di Arkeologia. Esaki lo bay tuma lugar Diasabra 24 di Juni entre 8.30 y 10.30’or di mainta, y pa esaki lo regula e admision”, Marguerita Wever a señala.
Prome cu esaki, Diabierna 23 di Juni, Museo Arkeologico lo organiza un encuentro cu e studiantenan na museo mes, na unda e publico cu ta inters por intercambia informacion y pensamentonan cu e studiantenan. Nan lo conta algo tambe tocante nan bida na Hulanda, estudio, experencianan, como studiante. Nan lo haci esaki cu Harold Kelly, y pa esaki Museo Arkeologico Nacional ta invita publico en general y specialmente mayornan, y hobennan cu tin den plan bay studia den futuro cercano, pa nan haya un tiki mas informacion y intercambia directamente cu e studiantenan menciona. E anochi di 23 di Juni, e encuentro lo ta entre 5’ or di atardi cu 7’ or di anochi y entrada ta liber.
