Minister Arends:
ORANJESTAD (AAN): Discriminacion a base di edad, of edadismo, ta un problema presente den nos comunidad, sigur den area di empleo, cu tin efecto negativo riba e grado di participacion activo di cierto gruponan. Por ehempel, den statuutnan di diferente entidad gubernamental a ser observa clausulanan preocupante tocante e edad di miembro di directivanan.
Den algun caso ta menciona edad como motibo di exclusion obligatorio den e rekisitonan pa wordo nombra como miembro di un conseho. Por ehempel, Serlimar S.G. no por tin miembro mayor cu 65 aña y na ANSA N.V., un comisario cu ta yega 70 aña mester tuma retiro.
Den e cuadro di e vision pa stimula participacion di Adulto Mayor den nos comunidad, Minister Arends a solicita consehonan di tur instancia cu ta resorta bou di su carteranan pa identifica y elimina tur forma di edadismo di nan organisacion rapidamente.
Discriminacion a base di edad ta innecesariamente ofensivo pa esnan afecta y tambe por perhudica e maneho di un organisacion. Edad ta aporta experiencia, conocemento y confiansa. Calidadnan cu mas bien mester wordo exigi di miembronan di un directiva. E exclusion arbitrario di candidatonan a base di edad, ademas di ta ofensivo, por causa un ‘fuga di talento’. Sector publico lo beneficia di elimina tur clase di edadismo, ora ta trata adulto mayor, di cada instancia.
Minister Arends a propone na conseho di ministro pa adopta e principio di no permiti uzo di edad como criterio pa contrata, nombra of despedi miembronan di directivanan. Nombracion y retiro den directivanan mester ta a base di cumplimento cu ‘Good Corporate Governance’. Esaki ta un vision cu lo purba di realisa pa mitad di otro aña 2024. Pues tur forma di edadismo lo mester wordo elimina di statuutnan di entidadnan gubernamental pa e tempo aki.
Adoptando e principio aki lo duna sector priva un señal pa sigui gobierno su ehempel y asina efectivamente combati e tipo di discriminacion aki riba nos isla.
Minister Arends ta remarca cu ‘nos comunidad di e tercera edad, cu a construi e pais aki, ainda tin hopi pa brinda nos’ y cu ‘e bon integracion di adultonan mayor den nos sociedad lo solamente fortalece nos mas como pais’.
