ORANJESTAD (AAN) – Parlamentario Ricky Hoek, di fraccion di MEP, den conferencia di prensa a elabora tocante dos tema cu ta encera presupuestonan.
E prome tema ta e presupuesto di 2024 y e di dos ta e presupuesto supletorio di 2023. Hoek a trece dilanti cu pa mas di 15 aña caba, e presupuesto di Pais Aruba no tabata wordo entrega na tempo. El a señala cu tanto e presupuesto di 2023 como di 2024 ta marca un diferencia cual Gobierno di Aruba y Gabinete Wever Croes II a cumpli cu e termino stipula pa articulo 5, inciso 12 di Aruba su Constitucion.
“Esaki ta bisa cu e presupuesto di Pais Aruba mester wordo entrega entrante 1 di September di e Aña Parlamentario cu ta aden. Di e forma aki nos por wak cu siman pasa, dia 1 di September, Minister di Finanzas, señora Xiomara Maduro, a entrega e presupuesto 2024 di Pais Aruba. Cu esaki nos ta marca historia, pa di dos biaha caba, consecutivamente, cu a entrega e presupuesto na tempo”, Parlamentario Ricky Hoek a bisa.
El a agrega cu esaki ta mustra tambe cu tin un surplus manera ta stipula den e leynan vigente, y ta mustra tambe un bon maneho financiero di gobierno, cu ta necesario pa e futuro generacionnan, unda cu gobierno por cuminza paga Aruba su debenan mas pronto posible. Un palabra di gratitud di parti di e Parlamentario ta bay pa tur e profesionalnan, Ministernan, y tur esnan cu a contribui y a haci un esfuerso sumamente grandi pa logra realiza riba e fecha 1 di September, cu e presupuesto 2024 a keda entrega na Parlamento di Aruba.
PRESUPUESTO SUPLETORIO:
“Esaki tambe ta otro avance positivo di Gabinete Wever Croes II. Di e manera aki por wak cu a logra entrega e presupuesto supletorio na tempo, caminda cu aworaki Parlamento di Aruba, por haci uso di su budgetrecht. Cu esaki kiermen, cu Parlamento di Aruba por bay controla e presupuestonan, e finanzas, economia y e maneho di e ministernan con esaki a bay te aworaki aki na 2023”, e parlamentario a indica.
El a agrega cu na momento cu Parlamento ricibi e presupuesto supletorio, por wak kico ta e cambionan di maneho, kico ta e cambionan den e presupuesto cu nan ta haciendo, y con leu e proyectonan cu nan ta bisa cu nan ta haciendo, ta canando. Di e forma aki Parlamento di Aruba tin bista amplio y concreto na tempo, pa asina por haci cambionan di ahuste y por informa na e ministernan di esaki y alavez e ministernan ta informa Parlamento, kico ta e cambionan cu nan ta haci den nan ministerionan, den nan maneho y den nan presupuesto.
“E presupuesto supletorio aki ta encera tur e informacionnan y datonan actual di e realidad di nos pais Aruba, tanto di economia como di finanzas. Un aspecto hopi positivo ta cu Raad van Advies ta bisa cu esaki ta un acto positivo, cu gobierno di Aruba a entrega e presupuesto na ora”.
Hoek a bisa cu di e manera aki nan por trata e presupuesto y a mustra cu nan ta traha na un manera responsable y cu gobierno kier pone su finansanan na orden y asina asegura e generacionnan futuro y nos tur cu ta biba riba e isla aki, un bon bida.
