E ta participando den Convencion di Cartagena
ORANJESTAD (AAN): Minister di Naturalesa y Nitrogeno, Christianne van der Wal, lo bishita e parti Caribense di Reino di 3 pa 8 october proximo. For di 8 october te cu 12 october Director General pa Naturalesa y Pesca Donné Slangen ta representa Minister van der Wal.
E biahe ta den cuadro di e Plan di Maneho di Naturalesa y Medioambiente di Hulanda Caribense 2020-2030, e conferencia internacional na Aruba tocante proteccion di biodiversidad den region di Caribe, y fortificacion di cooperacion entre e paisnan di Reino.
Durante su bishita, e minister ta bishita Boneiru y Aruba. Banda di esaki Director General ta bishita Saba y Sint Eustatius.
Durante su bishita, e Minister gustosamente lo kier mira con ta para cu naturalesa riba e islanan y lo papia cu esnan envolvi tocante progreso y implementacion di e Plan di Maneho di Naturalesa y Medioambiente. Na Aruba e ta participa na e parti ministerial di e reunion di Convencion di Cartagena pa proteccion di Biodiversidad den e region Caribense.
Componentenan di e programa
Aki ta sigui algun punto culminante di e programa.
E bishita di trabao ta cuminsa na Boneiru, unda e minister ta bishita e area di palu di mangel y e sitionan di reforestacion. E ta ansioso pa e bishita na Plantashi Fontein como un bunita ehemplo pa desaroyo di naturalesa na Boneiru.
Na Aruba e minister ta spera di firma un acuerdo di cooperacion cu e ministernan di Sint Maarten, Corsou y Aruba riba tereno di agricultura, naturalesa, asuntonan veterinario y internacional. E tres paisnan lo comparti conocemento y coopera entre otro den investigacion, reunion internacional y creacion di un Plan Nacional di Accion Strategico pa Biodiversidad pa implementacion di e palabracion internacional haci durante e COP15 Biodiversidad na Montreal na december 2022.
Ademas minister Van der Wal ta participa na e Sesion di Nivel Halto di COP-17 di e Convencion di Cartagena na Aruba. E tratado aki ta enfoca riba proteccion di biodiversidad marino den region di Caribe pa medio di, por ehemplo, indica e areanan proteha y especie di mata y animal proteha. Tambe e minister lo sostene un Memorandum of Understanding (MoU) pa establece un mecanismo di coordinacion pa promove maneho integral di oceano den e region Caribense.
Na Saba e Direktor General Slangen na nomber di Minister ta habri e laboratorio marino (wet laboratory) pa e proyekto di restoracion di coral. E proyekto aki ta inclui den e Plan di maneho di Naturalesa y Medioambiente y den e agenda di ehecucion di Saba. Sint Eustatius tambe lo haci uso di e laboratorio pa ehecuta nan proyecto di restoracion di coral.
E bishita di trabao na Hulanda Caribense ta termina cu un bishita na Sint Eustatius, unda entre otro ta duna atencion na erosion (incluso pa medio di cabrito cu ta cana rond liber), reforestacion y restoracion di coral.
