ORANJESTAD (AAN): Durante 3 aña y 8 luna trahando den Parlamento, Setty Christiaans-Yarzagaray a sa di hiba un nivel diferente den politica,
door di hiba discursonan al caso y conferencianan di prensa gran mayoria parti cu base di datonan presentado cifranan reflehando desaroyonan riba diferente tereno na Aruba.
USo di dato ta di gran importancia pa su persona mirando su deseo pa aporta na eleva nivel di discusionnan pero tambe di politica en general. USando data ta duna pueblo e oportunidad pa valida e informacion cu ta duna credibilidad na e informacion presenta.
Trabaonan den Parlamento: Apesar cu Setty Christiaans-Yarzagaray a traha casi 21 aña na Centraal Bureau Statistiek y algun luna na Departamento di Asuntonan Economico unda el a adkiri amplio experencia y experticio, asina mes mester menciona cu trabaonan di Parlamento, si kier haci’e bon y manera mester ta, tin su retonan.
Horarionan diferente y largo di trabao pa prepara pa tratamento di leynan, prepara pa reunion publico riba temanan cu no necesariamente ta di nos experticio, oranan for di cas y di famia, atende cu preocupacionnan di pueblo purbando di yega na solucion, ta entre otro aspectonan cu mester a custuma cu ne. Pero tambe tabata oportunidadnan pa siña hopi y adkiri mas conocemento.
Mester menciona cu e areanan cu a atende cu ne den Parlamento tabata diverso, resultando e ora cu mester tempo pa prepara, haci research pero tambe depende di e experticio di miembronan di nos mesun team. Team di fraccion di MEP ta bin di areanan diferente cu bon preparacion, cu un por a complementa otro ora un no tabata domina un area di experticio.
E añanan tras di lomba den Parlamento a yuda cada un prepara miho cu awe, si yega e oportunidad di sigui eherce e tareanan como Parlamentario, señora Christiaans-Yarzagaray ta cla p’e. Awor ya tin miho conocemento di e trabao y un structura forma rond di e tareanan como Parlamentario.
Gradici su 287 votadornan: Apesar cu campaña no ta un tarea facil pa un hende muher, Setty Christiaans-Yarzagaray ta convenci cu haciendo su trabao recto y corecto tambe a yuda aporta na su votonan. Mirando cu eleccion a yega poco prematuro alavez, a hacie un poco mas dificil pa bishita y yega tur caminda cu a desea. Reaccionnan ricibi durante campaña tabata hopi positivo y sigur un mensahe cu a keda cu su persona ta pa keda den contacto cu pueblo mas cu ta posibel.
Setty Christiaans-Yarzagaray ta tuma e oportunidad pa gradici di curason tur cu a deposita nan voto den su persona y ta compromete su mes di sigui haci su trabao mes of miho, kedando al caso, kedando riba nivel, haciendo uzo di data pero semper kedando e hende simpel y humilde. Manera tabata su dicho den campaña, haciendo su trabao Recto y Corecto y kedando “#SimplementeAmi”.
