Tips di seguridad - ORANJESTAD (AAN): Durante e ultimo simannan, Arugas a ricibi diferente yamada pa incidentenan relaciona cu gas di cushina (cooking gas).
Despues di a haci investigacion, Arugas por a deduci cu mayoria di e incidentenan aki por a wordo preveni si tabata tin un control/inspeccion di e sistema despues cu a haci cambionan di ekiponan cu ta usa gas.
Semper ta hopi importante, despues di haci instalacion, cambio den instalacion, conecta of reconecta ekiponan di gas pa tuma e siguiente precaucionnan como minimo:
- Controla tur conexion cu un solucion di awa cu habon;
- Prome cu cende candela warda por lo menos 15 minuut despues di a habri gas pa controla si ta sinti holo di azufre (webo putri). Den ambos caso, sea si tin scuma of holo, absolutamente no cende candela y sera e valve na e cilindernan inmediatamente.
- Habri tur porta y benta pa e cas/espacio por ventila bon.
Yama Arugas of Cuerpo di Bombero number 911.
Algun tips pa uzo (safe) di cilinder di 100 lbs y 20 lbs:
- Zorg pa semper e cilinder ta instala parti pafo di cas na un lugar bon ventila;
- Semper instala e cilinder den posicion vertical riba vloer of blokki di concret;
- No instala cilinder cerca di bentana of porta (distancia minimo: 90 cm);
- No instala cilinder cerca di aparato of motornan electrico (distancia minimo: 1.5 m);
- Mantene e cilinder mas leu posibel di e stoof of forno;
- Semper vigila loke bo ta cushina y paga e stoof ora ta sali for di cas;.
- Cera e valve di e cilinder ora ta bay cu vakantie;
- Laga inspecciona bo instalacion di gas por lo menos cada 5 aña door di un compania of tecnico di gas certifica.
