ORANJESTAD (AAN): "Aworaki a yega e momento pa conhuntamente cu APA, tambe DTP, tambe Cuerpo Policial pa sinta cu tur stakeholders na mesa y bin reglanan cu cada un hende cu ta transporta turista mester atene nan mes na dje", asina Minister di Turismo, Dangui Oduber a duna di conoce.
Oduber ta considera cu aworaki ta un bon momento pasobra no tin hopi barco crusero yegando Aruba. Anteriormente tabata tin casi 900 mil turista crusero y no tin espacio ya cu tur dia tabata tin miles di turista crusero.
Awor ta un bon momento pa sinta cu tur e partidonan un biaha mas, revisa tur e reglanan cu tin vigente di parti di Aruba Ports Authority (APA) como tambe di parti di DTP y KPA pa asina evita e problema caminda ta bin hopi discusion riba ken ta transporta e turista, ken a yega prome.
Mester bin un maneho unda tur partido ta respeta e reglanan y respeta otro pa evita crea e imagen negativo cerca e bishitantenan crusero, e mandatario a splica.
El a agrega cu den e area tin seguridad presente di parti di APA. Tin biaha tin polis tambe, pero aworaki mester bay re-enforsa e reglanan pa tur hende atene nan mes na e reglanan aki.
Esaki ta e momento ideal ya cu ta un comienso nobo pa APA den cuadro di e industria di turismo crusero unda cu aworaki a haya algun 'calls' di Celebrity Cruise Lines, pero Carnival tambe ta bay cuminsa gradualmente, a bisa..
