Director di KvK Martijn Balkenstein:
ORANJESTAD (AAN) – E director di Camara di Comercio y Industria di Aruba (KvK), drs. Martijn Balkenstein, den conferencia di prensa tocante e tema di scarcedad di trahado na Aruba, a bisa cu tur dunador di trabao, pero tambe empleadonan y henter Aruba no por cumpli optimalmente, ora cu tin un “Labor shortage”.
Balkenstein a señala cu di otro banda e prijsnan di producto tambe ta subi y por ripara caba cu sector di hotel ta buscando trahado tur caminda, y nan ta dispuesto di paga un tiki mas pero na final e ta redunda den e prijsnan di producto, y e riesgo ta cu inflacion ta bay aumenta.
Pesey ta importante pa KvK check cu diferente stakeholders, kico nan opinion ta y kico nan por haci nan tabata tin citanan caba y KvK ta combersa tambe cu gobierno, y nan tabata tin un encuentro caba cu Minister hunto cu stakeholders invita y nan kier instala un taskforce.
Director di KvK a señala cu nan tin cierto sugerencianan y nan ta loco pa haya e datonan cu nan ta bezig pa capta cu e encuesta, pa duna sugerencianan cu realmente ta yuda alivia e situacion actual.
Balkenstein a agrega cu tin diferente accion cu mester wordo tuma conhuntamente. Nan tin como binti sugerencia cu a wordo studia. No ta asina cu un medida so ta bay alivia e situacion pero mester ta un serie di adaptacionnan pa alivia e situacion na termino corto y largo.
Un di e puntonan cu enberdad ta resalta ta e salario, e minimum loon a wordo ahusta pero e sector comercial mes ta pensa cu kizas e mester cuminza wordo ahusta mas, y otro punto ta cu mester ta sigur cu e circumstancianan di labor ta mehora y cu e leynan ta wordo adapta.
“E hendenan jong no ta mara nan mes pa bida largo na un compania, nan kier traha menos ora, nan kier traha flexible, nan kier traha fo'i cas, nan kier gana mas placa; na momento cu bo a studia bon, bo por gana un poco mas placa. Pero aworaki e circumstancianan no ta optimal pa atrae e hendenan aki y laga nan keda akinan”, Balkenstein a comenta.
