Dia Mundial di Obesidad
ORANJESTAD (AAN): Dia 4 di Maart ta Dia Mundial di Obesidad, unda nos ta uni cu mundo hente pa actua ariba e problema aki. E tema aki ta uno di sumo importancia y ta recorda Minister Dangui Oduber pa sigui traha ariba prevencion pa yega na un Aruba saludabel.
Ministerio di Salud hunto cu partners manera DVG-Health Promotions, Plataforma di Saud, Healthy Lifestyle Center, Ibisa, Jump18 y Cool2BFit ta comprometi na enfoca ariba prevencion y e tema di Dia Mundial di Obesidad e aña aki, "Cambia Perspectivanan: Laga Nos Papia Tocante Obesidad y…," ta resona fuertemente cu Minister Dangui Oduber su strategia di cuido preventivo di salud. Door di stimula combersacionan tocante e tema aki, kita stigma, y desafia conceptonan falso, ta logra e meta di crea un sociedad cu ta compronde tur problema cu ta bin cu obesidad.
Obesidad no ta solamente un lucha personal, pero un reto social unda hunto, sosteniendo otro, nos por logra. Como Minister di Salud, “mi por garantisa bo cu Ministerio di Salud ta dedica na implementa polisanan cu ta promove estilonan di bida saludabel, cuido di salud alcanzabel pa un y tur, y ta encurasha un comunidad cu ta sostene otro den e lucha aki”. Ministerio di Salud su enfoke ta riba prevencion, y ta kere cu dor di traha hunto por logra avancenan significativo den e lucha contra obesidad.
Minister Dangui Oduber ta encurasha tur ciudadano pa tin e curashi, pa comparti bo storia y sostene otro ariba e caminda pa un futuro mas saludabel. Hunto como pueblo mester concientisa otro, boga pa un cambio y intercambia conocemento pa crea un ambiente cu ta stimula e bienestar pa un y tur.
Un sociedad mas saludabel ta cuminsa cu cada un di nos tumando decisionnan conciente pa nos mes salud. Hunto, laga nos traha pa un Aruba unda cuido preventivo di salud no ta solamente un estrategia, pero un manera di biba.
