Relaciona cu Luna Nacional Contra Abuso di Mucha
ORANJESTAD (AAN): Gobierno di Aruba, den su compromiso fuerte pa salvaguardia e bienestar y futuro di nos muchanan, a declara luna di april como Luna di Conscientisacion Nacional Contra Abuso di Mucha. Esaki ta enfatisa e determinacion y esfuersonan colectivo di Gobierno, Comision Nacional di Abuso di Menor, organizacionnan y fundacionnan gubernamental y no gubernamental y henter comunidad di Aruba, pa elimina e crimen grave aki contra nos muchanan.
Diabierna awo, 12 di april pa 6or di atardi, den solidaridad cu e lucha global contra maltrato y abuso sexual di mucha, Gobierno di Aruba ta ilumina Bestuurskantoor na colo blauw como un gesto simbolico y un recordatorio di e compromiso di Gobierno pa proteha derechonan y bienestar di cada mucha cu ta biba riba nos isla. Door di pone un enfoke riba e tema aki, ta fortalece e meta di inicia conbersacionnan importante, aumenta conscientisacion y mobilisa accion contra e crimen di maltrato y abuso sexual di menor.
Prome Minister, Evelyn Wever-Croes, den nomber di Gobierno di Aruba, ta extende un invitacion na henter nos comunidad pa uni na e evento importante di solidaridad aki diabierna awo, 12 di april cuminsando pa 6’or di atardi, pa Cende Luz Blauw pa conscientisacion y prevencion di abuso di mucha.
“Ban uni den speranza, y manda un mensahe fuerte cu maltrato y abuso sexual di mucha no tin luga den nos sociedad. Ban uni pa proteha nos muchanan, kendenan ta nos ciudadanonan di mas vulnerabel y esnan cu lo tuma over nos pais den futuro. Hunto, nos por haci un diferencia y sigura un futuro mas sigur y briyante pa nos muchanan”, Prome Minister ta enfatisa.
