ORANJESTAD (AAN): Minister Dangui Oduber a haci un anuncio importante diahuebs mainta relaciona cu cifranan basta alentador pa loke ta desaroyo di turismo y economia.
Oduber a splica cu e fin di siman cu a pasa a organisa e di dos vacunathon y el a resulta di ta un exito unda e comunidad a responde masalmente na e yamada y esaki a pone cu a yega na 62, 218 persona cu a ricibi nan vacuna na Aruba.
Esaki ta pone Aruba como e pais na e di dos lugar cu mas a vacuna su poblacion. Como consecuencia di esaki turismo ta recuperando hopi mas avansa den comparacion cu tur e competidornan.
E mandatario a remarca cu esaki tabata e vision cu tabata tin ora cu e cuminsa cu e programa di vacunacion ya cu e vacuna ta e solucion pa por sali for di e pandemia, recupera turismo y economia.
"Awe nos ta mirando e frutonan di e vision aki, e frutonan di e vacuna pasobra nos ta mirando cu e casonan ta bahando. Nos ta bao di un average caba di 15 caso nobo pa dia", a señala.
Banda di esaki a suavisa mayoria di e medidanan. A kita toque de queda despues di mas di un aña cu toque de queda tabata vigente, a agrega.
Pero e noticia cu e mandatario tabata kier a comparti ta cu turismo ta creciendo, ta recuperando y esaki sigur ta duna un perspectiva hopi positivo ya cu turismo ta e unico pilar economico di Aruba.
Despues di a cuida e salud di e poblacion, amplia e capacidad di hospital, presenta e solucion cu ta e vacuna, e enfoke di gobierno na e momentonan aki ta recupera turismo totalmente, a bisa.
Na comienso di aña Aruba Tourism Authority (ATA) a presenta tres escenario pa loke ta turismo pa 2021 cual tabata e escenario optimista, uno cauteloso y un di tres conservativo.
Cerando luna di Mei Aruba ta surpasando e scenario di mas optimista cu ATA a proyecta na inicio di aña, Oduber a remarca. Esey kiermen cu e cifranan ta bay ta mas adelanta di loke a pensa pa cera luna di Mei.
Pa luna di Mei ta proyectando cu ta bay cera cu mas di 70 mil bishitante y esaki ta nifica cu Aruba ta bay recupera un 79% di turismo den comparacion cu aña 2019. El a bisa cu 2018 y 2019 tabata e mihor añanan den historia di pais Aruba pa loke ta trata turismo.
Banda di esaki ya caba Banco Central a proyecta caba cu e cantidad di placa cu turistanan ta laga atras den economia lo ta mas halto cu 2019 y esaki ta indicacion cu ta turistanan afluente, di calidad ta biniendo Aruba, Dangui Oduber a splica.
El a referi tambe na un articulo cu a wordo publica den New York Times unda ta duna reconocimento na Ministerio di Salud di Aruba y na Gobierno pa e manera con a atende cu e crisis y pesey awor ta mirando e resultadonan sumamente positivo den e cifranan di turismo.
New York Times tambe ta indica cu Aruba ta un lider mundial den vacunacion y cu Aruba ta optimista den alcansa e inmunidad comunitario mas lihe posibel.
