Prome minister Eman y minister Wyatt-Ras a cambia decision di e lista positivo di remedi

Parlamentario Dangui Oduber:

Nan a gaña tur nos grandinan: Keto bay pensionadonan ta pagando pa cierto remedinan 

ORANJESTAD (AAN): Ta hopi fresco den nos memoria con durante mas di 1 aña largo como tambe durante periodo di campaña, tanto prome minister Eman como minister Wyatt-Ras a instiga pueblo pa cu e decision di e lista positivo di remedi. Nan a haci e promesa cu na momento nan drenta gobierno nan lo kita e lista positivo aki pa tur hende, specialmente pa cu nos pensionadonan cu nan NO mester paga pa ningun pero ningun remedi mas.

            Tempo nos tawata den gobierno durante e pandemia, un di e condicionnan di gobierno di Hulanda tawata cu mester corta 60 miyon florin den cuido medico. Pa e motibo aki dado momento mester a tuma un decision hopi dificil cu mester a kita e lista positivo di remedi.

            Na mes momento nos mes a bisa cu manera e situacion financiero di AZV drecha, cual a bira miho tambe, nos lo percura bek pa e pensionadonan NO mester paga pa NINGUN remedi mas.

            Di e forma aki na december 2024 nos a tuma un decision den conseho di minister pa NO cobra ningun pensionado mas pa ningun remedi pasobra AZV tin actualmente un surplus di mas di 100 miyon florin y no por hustifica mas keda cobra nos pensionadonan pa ningun remedi. Ora e situacion financiero tawata precario tawata dificil pero awor cu tin placa na abundancia no tin hustificacion mas pa keda cobra nos grandinan. E decision aki mi ta comparti hunto cu e articulo aki pa asina tur hende por lesa e decision aki y wak pa nan mes kico e decision tawata. Nos a manda e decision aki pa AZV y duna nan e instruccion pa kita e lista positivo pa tur pensionadonan.

            A bin cambio di gobierno y nos a spera cu e gobierno AVP sin Futuro lo percura pa e decision aki wordo ehecuta y percura pa ningun pensionado mas mester paga pa remedinan. Nan kier a bay pronkea cu nos logronan y nos ta condena y lamenta cu nan a cambia nos decision y di e forma aki perhudicando nos grandinan y pone nan keda paga pa cierto remedinan. Nos a wordo acerca pa masha hopi pensionado expresando nan preocupacion y disgusto pa cu e decision di e gobierno nobo aki.

            Nos a tuma nota cu nos decision a wordo cambia pa prome minister Eman y minister Wyatt-Ras pasobra keto bay pensionadonan mester PAGA pa varios remedi. Cu esaki nan a mustra cu nan a dal pensionadonan un cara abou, nan a gaña nan, nan a malinforma nan, manipula nan y tuma tur pensionado haci un biaha mas.

            Nan a instiga, nan a crea y sembra rabia y odio, nan a priminti cu pensionadonan NO mester paga mas pa remedinan y awe nan a cambia nos decision pa toch sigui cobra pensionadonan pa cierto remedinan. Ta hopi tristo y bergonzoso con e hendenan aki a tuma tur hende haci y awe keto bay pensionado nan ta wordo afecta pa e decision nobo di sr Eman y sra Wyatt Ras. Pueblo ta exigi pa bin cambio di inmediato den e decision aki.